Taucoko mai

ESA levu sara na veisau ena gauna qo me vakatautauvatataki kei na noqu gauna ni veituberi kei na qito.? Oya na veika e vakaraitaka ko Josateki Savou na dauniveivakatavulici ka dauqito e liu ni timi ni rakavi lewe ya vitu ni Viti.

Ena nona vakamuria tikoga o Savou na nodratou qaqa na noda toa ni vala ena rara mai Vancouver ena mua ni macawa sa oti, e kaya ni marautaka sara vakalevu na veisau e basika tiko vei iratou na noda cauravou.

?Au kerea ga na noda veitokoni vakalevu na lewenivanua vei Gareth Baber na dauniveivakatavulici kei iratou na cauravou dauqito,? e kaya o Savou.

E kuria o koya ni sa qai vakadeitaka rawa o Baber na nona timi digitaki me rika tiko ena loma ni rara me vakatekivu mai na qito vakatobu me yacova ni la?ki cava sara na fainala. E kaya ni sa ratou matua talega mai na cauravou ena nodratou veikilai qitoqito vinaka.

?Eda raica na nodratou qito na noda cauravou e kaba cake tikoga na i vakatagedegede ni nodratou qito ka sega ni lako sobu me vakatautauvatataki kei na gauna nei Ben Ryan,? e kaya.

E kuria o Savou ni o Ryan e taura e rua na yabaki me qai laurai na vua ni nona veituberi, ka dau kaukauwa ena i matai ni sotasota ia e la?ki malumu ena i karua ni sotasota.

?Vei iratou na qito tiko qo keda sarava vinaka e malumu ena i matai ni sotasota ia e qai kaukauwa sara ena karua ni sotasota, me vaka ni ratou a druka mai Sydney ka la?ki qaqa e Niu Siladi, ka iratou druka mai Las Vegas ka la?ki qaqa e Canada ena Moniti qo,? e kaya o Savou.

E kuria ni da raica ekea ni sa toso cake tikoga na nodratou vakavakarau kei na kaukauwa ni qito e ratou vakayacora na cauravou.

Ia, e tukuna o Savou ni marautaka sara vakalevu ni sa rawa ni ra konitarakitaki na noda cauravou ena vuku ni qito ka vaka talega kina na nodra veisaumi tiko ena qito.

?E dua sara na veisau levu au raica mai na gauna ni noqu veituberi kei na gauna qo ni ra sa konitarakitaki ka veisaumi vakavinaka na noda dauqito,? e kaya o Savou.

Ia, ena sotasota ka tarava mai Hong Kong ena liutaka tiko o Viti na Tobu A ka na qito tiko kina kei na timi ni Niu Siladi, Samoa kei Rusia. E na qai vakayacori tiko na sotasota qo ena i ka 6 kina i ka 8 ni vula mai oqo.

More Stories