Taucoko dina

NA timi ga e na taura matua tiko na veika e vakavulici vei iratou e na gauna ni vakaukauwa yago, e na rawa ni vakacacakacakai koya e na gauna ni qito.

E vakamacalataka toka mai o Usaia Koroivunilagi na dau ni veivakatavulici ni timi lewe ya tinikalima ni Nadi, ni sa tiko vei iratou na timi ni Fiji Warriors na veika kece e vinakati me kila e dua na dau qito, ia, na kena cakacakataki ga e loma ni rara e sa na vakatau sara ga vei ira na mata meke era na matanataka i loma ni rara.

E vakavinavinakataka talega o Koroivunilagi ni ratou sa curu veimaliwai tiko na noda dau qito e na noda vanua, kei ira na gole tiko mai valagi.

Tomana ni ratou sa kila tikoga na dau ni veidigitaki na cauravou e ra sa digitaki oya, e na i tuvaki ni yagodra ka vakakina na nodra qitoqito e loma ni rara, ka vakakina na veimaliwai e na taudaku ni qito. Kuria ni o keda na i taukei e da sega ni dau vakavulici e na qito rakavi, me vakataka e dau vakayacori vei ira na timi mai valagi, oya ni dua ga na gone e qai tubu cake tiko mai, sa matau vua na cici kei na veicebayaki, ia, na lawa ga ka vakarautaki mai na i soqosoqo ni rakavi ni vuravura, e da sa na qai vulica me rawa ni taucoko kina na qito rakavi.

Taura mada ni vuqa na gauna me da gole ki na noda veikoro Vakaviti, e da na raici ira na gone e na nodra qito tiko e yasa ni koro, ka ra veipasitaka tiko e dua na tavaya lala, se dua na niu drokai.

?Oya na vuna e da kila totolo kina na veipasitaki ni polo, na veicumu, kei na noda taqomaka na noda yasana me ratou kakua ni botea mai na i to mai yasana kadua,?? e kaya.

Kuria ni o ira mai valagi na ka lalai kece e vakavulici vei ira me vakataka na i walewale ni nodra cici kei na i vakarau ni veivesu vakacava me ra vakayacora ni dua e sa cicivaka tiko mai na polo.

Ia, e tomana o Koroivunilagi ni vakabauta ni dua na timi vinaka e ratou sa na biubiu tiko e na Vakaraubuka oqo.

?E dina ni vuqa vei ira na cauravou e ra toso cake tiko na nodra yabaki ni bula, ia, na kila ga e se tiko vinaka sara ga,?? e kaya.

Tomana e na nona kaya ni tautauvata ga na i vosavoasa oya ni ?Sa qase na bitu, e sa qai gata??.

E na viavia tautauvata sara ga kei iratou na lewe ni timi ni Fiji Warriors ni sa qai matua mai na nodratou kila e na qito rakavi lewe ya tinikalima.

Sa nuitaka tu o Koroivunilagi ni na dua na qito vinaka e ratou na la?ki vakayacora na noda toa ni vala e na tolu na valataki vanua e ratou sa lakova oqo, ka sa kerea na noda veimasulaki baleti ira na cauravou, kei ira na i vakalesilesi e na i lakolako oqo.

More Stories