AU vakavinavinaka sara vakalevu ki na Marama na Radi Levuka, kei na noqu tikina ko Levuka, e na noqu matataka mai na neitou tikina e na cakacaka ni liga e na soqo ni Lomaiviti ka tekivu e na Vakaraubuka ni macawa sa oti.
E vakadeitaka mai na i tukutuku oqori ki na Na i Lalakai ko Marica Vinakadina, na marama ni Vuma, ka la’ki sarava vakavoleka na ramase ni cina mai na koro makawa kei Viti, e na koro ko Vagadaci.
E mai volitaka tikoga o Vinakadina na nona i taube ka buli ga mai na pepa kei na i olo ni sucu, ka vakakina na dilo, e na kena boro vinaka tu, ka da sega ni vakabauta ni vua ni dilo.
E kaya na marama ni Naova oqo, ni dua na vuli levu vei koya e na nona mai volivolitaki e na macawa oqo.
Tomana ni vulica mai na caka taube vua e dua na marama ni Solomone, ka rau a ciciva vata na gasagasa ni daniva ki Vagadaci.
“Na noqu mai volivolitaki oqo, e vakarabailevutaka sara ga na noqu rai, ka vuqa sara na veika vovou au mai vulica ki vei ira na marama keimami volivolitaki vata tiko oqo.
“Au na lesu qo inakoro, au na la’ki vakavulica sara ga vei ira na vo ni marama na veika au sa vulica yani e na noqu tiko oqo,” kaya o Vinakadina.
Kuria na nona i talanoa ni rawa ni taura e tolu na siga na nona cakava e dua na nona i taube, oya na nona viviga na pepa, tonia e na vanisi, qai mai toburaka yani e na veimataqali i boro dui roka me rawa ni vakarairaivinakataka.
Na gauna e sa mamaca vinaka kina e na kena cilavi koya vakavinaka na siga, sa qai mai tuiya yani ka kilai ga e kea na maqosa ni ligana na marama oqo.
E kaya o Vinakadina ni gauna o sa cakava kina e dua na i taube, e dodonu mo yalo mamarau, ka dolava toka na i vakatagi me rawa ni ko cula tale na ligamu, e na matailalai ni kena qara.
Tomana ni i lavo e rawata mai na nona volitaki taube, e sa yaga sara ga ki na vuvale, ka vakakina na nona sa vakavulici ira tiko na goneyalewa mai nakoro, ka ni sa kila o koya ni sa i vurevure ni lavo vinaka dina.
