Tarovi Na kucu

ESA veivakauqeti tiko vei ira na lewenivanua ena tikina o Nalawa mai Ra o Josaia Niudamu mai na Tabana ni Veibeitaki ni matanitu ni bibi na kena veitalanoataki ka tokoni na cakacaka me na tarovi kina na kucu kei na nodra dau vakasagai na marama ena noda i tikotiko.

Ena kena vakayacori na vuli ena loma ni tikina, vakaraitaka o Niudamu na vakailesilesi liu ena tabana ni veibeitaki ni matanitu ni ra sa rui kauwai tiko na turaga ni vanua ena kisi ni veivakasagai kei na kucu e sa yaco tiko vakawasoma ena noda veikoro kei na i tikotiko.

Tukuna ni dua na kisi ena yabaki sa oti oya na nodratou kucuva e lewe lima na turaga e dua na marama yabaki 50.

Esa vakabibitaka saraga ena nona vosa vei ira na tiko ena vuli oqo mai Nalawa o Niudamu ni ka bibi na nodra veitalanoa na turaga ena vuku ni ulutaga oqo kei na veika e rawa ni vakayacori me tarovi kina na i tovo lolovira oqo.

Tukuna talega o Niudamu ni sa tiko na nodra i tavi na turaga ni vanua ena kena vunautaki ka me na wali na leqa oqo mai na noda koro kei na i tikotiko me rawa ni veivuke vei iratou na tabana ni matanitu era qarava na kisi ni basu lawa vakaoqo.

Ena nona cau mai ena i tukutuku oqo o Nai Talatala Iliesa Naivalu mai na Fiji Council of Churches, vakaraitaka o Naivalu ni da sa vakawiwimata ena kena yaco veitaravi na kisi ni kucu ka rogoci vakawasoma mai na veitabana ni tukutuku.

?Ena kena kidroataki vakalevu na tubu cake ni kisi ni kucu e Viti, ki na dua na kenai wiliwili ka da vakawiwimata kina vakalevu e na kena sa rui veitaravi, nai valavala ni kena vakayacori e na kena rui rerevaki ka vaka kina ko ira era vakaitavi kina kei ira e vakayacori vei ira.

?Sa voqa tu ga e veigauna na domodratou na Women?s Crisis Centre ena nodratou tutaka vakaukauwa me vakabibitaki nai totogi e tau vei ira na vakayacora na kucu me rawa ni tarovi kina vakadua na kena vakayacori.

?Au a taroga tiko e na vica na macawa sa oti, ni kevaka e sa mani toroi cake nai totogi ni kucu ki na tini se tinikaono na yabaki, e sa na tarova li na levu ni kucu e vakayacori tiko e Viti?

?Au nanuma vinaka tiko, e na vica na yabaki sa oti e vakatauca kina e dua na Turaganilewa nai totogi me yabaki 13 ki valeniveivesu e dua e a beitaki e na kucu. Ia ena yabaki oya ka yaco mai na yabaki nikua, esa qai taratarabewa ga nai wiliwili ni kucu e vakayacori e na veivula e na noda vanua.

?E dua na vakasama au dau tutaka tiko, ni kevaka e kilai taumada na vu ni kena yaco tiko e dua na leqa, o sa walia rawa na veimama ni leqa oya.

?Baleta e vuqa na gauna, e da biuta yani nai wali ni leqa e rogo levu kai sau levu, ia e sega ni lai walia na leqa,? e vakaraitaka o Naivalu.

More Stories