Tarakaimatai e Koronikalou

Update: 10:27AM E dua na soqo lagilagi a vakayacori mai na koro vakaturaga o Cautata, Bau e Tailevu baleta tikoga na bibi ni kena vaqaqacotaki na veiwekani, ena siga ni vakacagicagi ena Vakaraubuka sa oti.

Vei keda na i Taukei, e da dau kilai tani ena noda kilai ira na wekada, oya na i sema mai vei ira na noda i tubutubu turaga kei ira na i tubutubu marama.

Ena siga oya, era laki veikilai ka caka talega kina e dua na soqo ni kere veivosoti ena loma ni vuvale kei na veiwekani ena vuvale nei Roko Tui Cautata o Joji Koronikainamata.

Na vuvale oqo, e ratou taura tiko mai na i tutu ni veiliutaki ni Roko Tui Cautata mai vua na i matai ni turaga e soli vua, me yacovi Joji Koronikainamata ka sa i ka ono ni turaga me taura tiko mai na i tutu oqo.

Na soqo oqo e duatani duadua, baleta ni laki vakamatatataki vei ira na mataveiwekani na nodra i sema mai vua na i matai ni Roko Tui Cautata o Joji Koronikainamata ka sucu ena 1877 kei ira na tacina kei na nodra i sema mai oya, me yacova mai o ratou na itaba tamata eratou sa tiko ena gauna oqo.

E oso na loma ni vakatunuloa oqo, ka soli talega na kena draki ena soqo vakaveiwekani oqo.

Era laki veikilai ka ra laki soqo vata na veiwekani era semati vakadra ena tokatoka o Tarakaimatai, ena mataqali o Gusunavakabou. Nai matai ni vuvale o Naitukudali ka kawa mai kina na Roko Tui Cautata, oya o Joji Koronikainamata.

Na i karua ni vuvale o Mataimati , era kawa mai vei Paula Gade. Na i katolu ni vuvale o Naivakabegusu, era kawa mai vei Jone Vukayawa

Na i kava ni vuvale o Vunitiri/Nakaruku, era kawa mai vei Isikeli Vulavou

Na i ka lima ni vuvale o Wakaya, era kawa mai vei Sainitiki Raiqavi I

Na i ka ono ni vuvale o Tarakaimatai, era kawa mai vei Lote Tikovagone.

Ka rau lewe rua na yalewa, oya o Sainimili Domowaqa, kei Alisi Ramumu.

Ni ra mai sota vata na veiwekani, era veimarautaki, ra veiwali na veitavaleni, ka ra luluvu talega ni ra sa qai mai sota vata vakaoqo me rawa nira veikilai tiko kina na matavuvale oqo. E dua na i wase ni veiwekani oqo era lako sara mai valagi, mai Ositerelia, eso era gole sara talega mi Vanua Levu mera mai tiko ena soqo vinaka oqo. E tuvani vakamatata vei ira na lewe ni vuvale na nodra vu, kei na basoga ni vuvale e ra dui vakawati kina na nodra Tutu kei na Bubu, ena kena vakaraitaki ena yasa ni vakatunuloa na kena tuvani sobu mai na nodra kawa. Na vanua era laki vakawati kina kei na luvedra, ka dua na gauna vinaka ena nodra kila na veiyasana e Viti era laki veisemati tu kina. Ni oti na kena kacivaki na nodra yaca ni vuvale, era qai laki lululu vua na Roko Tui Cautata, o Koronikainamata ka dua na siga lagilagi dina.

Ni qai oti na nodra veikilai, e ra sa qai vakayagataka e dua na i vakasigalevu totoka, ka caka talega e dua na soli me rawa ni vakayagataki tu ena vuku ni oga ni vuvale, se dua na ka e lavaki mai vanua.

E kaya o Koronikainamata ni vakavinavinakataka na soqo lagilagi oqo, ka marautaki ni ra mai veikilai ka semati vinaka tu na veiwekani era dau kilai tani kina na noda qase ena gauna e liu. E rauta ni 300 na veiwekani era semati vei ratou na lewe vitu na veitacini oqo ena itokatoka oqo Tarakaimatai, era se qai laki sota tiko ena i matai ni gauna. E qai dina kina na tikini i Vola Tabu oya: �Raica na kena mata vinaka ni ra sa tiko vakalomavata na veiwekani.�

More Stories