Taleitaki o Lagani mai Taveuni kei Rabi

Update: 10:59AM NI sa bula vinaka tale mai na veiwekani ka ko ni dau taleitaka na vakawilika na i talanoa ni nona lagasere wavokiti Viti, Pasifika, ka vaka kina ki valagi o Lagani Rabukawaqa e na nona dela ni gauna.

Ni vosota ni a mai cegu toka vakalailai e na vica na macawa e na vuku ni nona osooso o qasenivuli vakacegu Iliesa Baravilala e na kena a vakayacori tiko na i ka 70 ni yabaki ni nona siganisucu e na vula sa dromu.

E sa na qai tekivu tale e na macawa oqo na nona lagasere na domo koula ka vakairogorogo sara e na gauna ko ya.

Ni tei wiliwili sara yani:

E vakamacalataka o Baravilala ni ratou a ciqoma e dua na veisureti mai na koronivuli na Rabi High School ki na dua na nodra kumuni lavo ni koronivuli ka me la�ki vakayacori e Taveuni kei Rabi.

E kaya o Baravilala ni a rugurugua tu na draki e na nodratou a biuta na rara ni waqavuka mai Luvuluvu e na mataka ni siga kaya e na i lakolako ki na yanuyanu ni tagimouicia mai Taveuni, e na waqavuka rogo na Fiji Air.

Kuria ni totoka vakaoti na draki ni vuka e na mataka oya, ni vuka baleta na yatu yanuyanu e Viti e loma, takosovi na Koro Sea me yaco sara yani ki na yanuyanu ni teitei bulabula mai Taveuni.

E kaya o Baravilala ni ketekete ni bici tu na lomalagi e na gauna sa vakaroro yani kina na Adi Kasaqa e na rara ni waqavuka mai Matei.

Kuria ni ra sa osodrigi tu na wawa mai rara ni waqavuka, ka vaka talega kina o iratou na komiti ni Koronivuli mai Rabi me tavaki na i lakolako yani mai Suva.

Tomana o Baravilala ni oti ga na nodra veikidavaki, sa toso sara na i golegole ki na nodratou i cili na Meridian Hotel mai Taveuni.

E kaya na turaga qasenivuli vakacegu ni ratou la�ki cegu vakalailai, dua na vakasigalevu totoka ni bera ni ratou qai gole yani kina na olo levu ni Lotu Ekelesia, Katolika mai Wairiki me sa tekivu ki na na i coco ni nodratou veivakamarautaki mai Taveuni vata kei Rabi.

Kuria o Baravilala ni osodrigi vakadua na olo levu oya vei ira na lewe ni vanua e Taveuni e na nodra via rogoca ka sarava na nona lagasere na domo kamica ni koro ko Waitabu mai na Yatu Lau, ka vasu ki Sawaieke mai Gau.

Tomana o qasenivuli vakacegu ni tubu na kaikaila, vakasausau kei na vakatagi sici ni sa botea yani na koro ni lotu oqo na domoi Lagani kei na voqa ni nodratou i vakatagi totoka na mataqiriqiri rogo mai Suva na Spinning Wheels.

�Kadresu ga na fakawela kei na i regu gasagasa vei Lagani mai vei ira na marama ni Cakau, vakabibi ni sa taubena voli o Lagani na salusalu talei e ra kilai tani kina na marama ni Ai Sokula, na tagimouci, au yali ni kaya vaka ca, au kaya lo lia, e dau tukuni mai Naova ke, � kuria o Baravilala.

Kuria o Baravilala ni cava na nodratou soqo mai Wairiki, sa mua lesu na nodrau i lakolako na veitinani ki na neitou i cili, e na lori ni ovisa e na nodra sa veicicivi mai na lewe ni vanua me ra lululu, se me ra bau tara wale mada ga na bele ni nona sote.

Tomana o Baravilala ni ratou vakaleleca na nodratou vakavinavinaka ki na nodratou veitaqomaki na liga ni lawa vei Lagani mai Taveuni, kei na nodratou vakarautaka talega e dua na i vakayakavi vinaka me i vaqa e na siga oya.

E kaya o Baravilala ni siga tarava e ra sa veitalatala e na wavu mai Taveuni me sa mua yani na i lakolako ki Rabi.

Kuria o Baravilala ni vakadimaravu tu na dela ni wai e na soko lagilagi oya, ia, ni ratou yaco yani e na wavu mai Rabi era sa osodrigi tu na lewe ni koro e na yaloyalo kei na lagasere ni veikidavaki, ka volai tu e na dua na i sulu vulavula na �Welcome to Rabi Lagani Rabukawaqa�.

Tomana o qasenivuli vakacegu ni totoka vakaoti na i rairai bulabula ni yanuyanu ko ya, ka ra mata mamarau na lewena e na gauna e ratou vodo siviti ira kina me ratou la�ki vakayagataka na i vakasigalevu totoka ka ratou sa vakarautaka toka mai na komiti ni Koronivuli na Rabi High School.

E kaya o Baravilala ni ratou kurabuitaka ni ra sa kelekele talega yani na waqa ni vakalele mai na tai ki Vanualevu e Natewa, Saqani kei na veikoro voleka, me ra la�ki saravi Lagani ka tokona vata na sasaga yaga ni nodra koronivuli na yanuyanu o Rabi.

Kuria ni osodrigi vakadua na olo levu ni koro liu mai Nuku, ka sa baci tubu na kaikaila, vakasausau kei na vakatagi sici, e na gauna sa memela cake kina na domo ni nodratou i vakatagi na Spinning Wheels ka salamuria yani na domo koula i Lagani kei na sere ka rogolevu sara tu ga e na yabaki oya na �Isa bau laga mai�.

E kaya o Baravilala ni sa sega ni caka rawa na vude e na nodra veisugusugu na lewe ni vanua e Rabi kei Kioa, ka ra dolea lesu na gonevuli e Rabi High e na dua na mata meke bula, kadresu vakadua na soqo.

�Ni qai mai cava na soqo e na bogi oya, keitou marautaka sara vakalevu ni keitou kila ni sa rawa vinaka na i naki ni sasaga ni Koronivuli mai Rabi ka keitou a sureti mai kina, � e kaya.

Tomana o Baravilala ni sa mua lesu tale na i lakolako ki Natuvu Jetty e Vanua Levu, ratou vakaleleci sara yani ki na rara ni waqavuka e Nasavusavu, me ratou sa takosova tale mai na maliwa lala ki Nausori.

Kuria o qasenivuli vakacegu ni ratou mai veitalatala e na luluvu e Nausori, gole lesu o Lagani ki Vulinitu, ratou gole na mataqiriqiri ki Suva, ka ratou sa waraki waqavuka talega na i golegole ki Naova, �Isa, moce qi sa la�, e dau kaya ga o Naivalu mai Yasawa.

Sa koto oqori e ra na sere ni nodratou i lakolako ki Taveuni kei Rabi, ka a vola ga na dauvolasere rogolevu e na noda vanua (I.B) ka qai solia vei Georgina Ledua me lagata.

Biu ko Luvuluvu me�u vuka yani

Taveuni au sarava mai lagi

Karawa koto na loma ni Takali

Taveuni Ailadi

Oilelei Taveuni yanuyanu mai Cakau

Kena otela domoni e totoka vei au

Noqu mai talevi iko rui ka e uasivi

Lei na tagimaucia sa dau kemu i divi

Oilelei Taveuni

Rabe, Yanuca kei Qamea au nanuma

Yacata, Laucala ciri malua

Matei sa totoka vakadua

I roro ni waqavuka

Uluiqalau au sarava e mataqu

Taveuni qori sa kemu i cavu

Somosomo kena toba e maravu

Wairiki wananavu

E vakaraitaka toka o Baravilala ni sa na volitaki tale tikoga e na vei sitoa ni Procera Music Shop e Viti raraba, e na siga nikua, e tini na nona sere ka se bulia sara mai e na yabaki 1980 vakacaca, ia, e vakamuria tale na kena i lagalaga o Jale Mareau e na nona katokatoni vou oqo, e na nona veiwakitaka toka na kena i vakatagi o Maciu Saranuku, ka tau ya $15 dua.

Qarauna de ko ni na qai bera, kusa yani ni sa yavalati na wai.

More Stories