Tabu na veicurumi vale

E dua na i taba oqori, eratou taba vata na vakailesilesi e cake ni Tabacakacaka i Taukei kei iratou na lewe ni Palimedi ena kena laki vakaraitaki tiko ki na komiti e Palimedi e so na vakatutu e vauci kina na veiqaravi ni Tabacakacaka i Taukei. Veitaba: FILE

E a vakatataro tu na Nai Lalakai ki na Tabacakacaka i Taukei ena vuku ni kisi ni kucu, na veivaqaseni kei na tukutuku e sega ni rogorogo vinaka e da sa rogoca vakawasoma me baleta na nodra vakalolomataki na noda marama kei ira na i solisoli.
Oqo na veika e nanuma na Vunivola ni Tabacakacaka i Taukei, o Naipote Katonitabua ena ulutaga oqo. Ni wiliwili sara yani.

E dua na leqa levu sa sotava tiko na noda vanua na gauna qo, oya na nodra dau vakalolomataki na marama kei na gone. Sa voleka nida rogoca ena veimacawa na itukutuku ni kucu, na veivaqaseni kei na nodra moku vakaca na marama kei na gone. E sa bau vakaraitaka e dua na turaganilewa levu e Viti, ni sa vaka tiko mai me mataveilewai ga ni kucu na Mataveilewai e Cake. Qo sa dua na itukutuku vakamadua, vakabibi vei keda na itaukei.
E dodonu beka meda lialiaci kina se sega?

Na isau ni taro qori ena vakatau sara ga ena itovo kei na ivakarau ni bula eda bulataka kei na veika eda vakabauta ni dodonu. Sa kena ibalebale qo ni na kena valuti na nodra vakalolomataki na marama kei na gone sa tiko sara ga ena dui qeteqeteniligada.

Ia, ena noqu itutu vakaVunivola Tudei ni Tabacakacaka iTaukei e dodonu meu vosa ena itovo kei na ivakarau eda vakabauta na itaukei ni na vakavurea na veilomani ka vakabibi na nodra vakamareqeti na marama kei na gone.

E tiko na ivakadinadina ni so era a vakasavi ena vuku ni veicurumivale. Na veicurumivale e vosa makawa vakaviti ka kena ibalebale na tiko veibutakoci, veidauci, na veivaqaseni se kucu. Qo e itovo lolovira ena gauna e liu ka vakavuna sara ga na nodra vakasavi laivi e dua na umatamata mai na nodra delaniyavu. E so era vakamatei, ia ena so tale na vanua e vakavuna sara ga na vakacibi ivalu.

Ni sa va qori na itotogi e salamuria na itovo ni veivakalolomataki, sa kena ibalebale qo nira sega ni ciqoma na qase e liu na itovo ni veicurumivale e vakayacori vei ira na marama kei na gone.

Eda rawa ni tukuna nira bulataka na vuda e dua na itovo era vakamareqeti ka vakamenemenei kina na kawabula ni nodra vanua vakaturaga.

Ia, ni gadrevi me vakadinadinataki na itukutuku qori, ena yaga meda raica ga na itovo kei na ivalavala vakavanua era vakamareqeti kina na marama kei na gone.

Qo eso na kena ivakaraitaki, na iduguci: qo na nona lai kerei vakavanua na goneyalewa me vakawatitaki. Na ikotiniulu: na magiti e vakarautaki me kotivi kina na ului tinanigone ni sa buketetaka tiko na luvena.

Na itunudra: qo na magiti e vakarautaki ni sa sucu na gonevou. Na vakatokayaca: na kamunaga e cabo me kerei kina me vakatokayacataki na gone. Na roqoroqo: qo na nodra mai roqota na gonevou na veiwekani.

E sa qai tiko na magiti e vakarautaki ena nona matai ni cabuka se qoli na gone. Sa qai tiko na veiqaravi ni tikoibure vei ira cauravou kei na butuidravu vei ira na goneyalewa. Na itovo vakavanua e vakamenemenei kina e dua na itaukei e tekivu mai na gauna e kunekenutaki kina me yacova ni ratou sa lai veimaroroi tale na wekanimate ena ibulubulu.

Ia, na leqa levu sa donumaki keda tu na itaukei ena gauna qo, oya na noda sa tamusuka laivi eso na ivakarau vakavanua era dau vakamareqeti kina na gone kei na marama.

E so beka vei keda eda sa gadreva ga me vakarawarawataki na cakacaka, ia eda sega tiko ni liaca rawa na revurevu ni noda sa vakamamadataka na bibi ni nona bula vakatamata.

E levu tale ga vei keda eda sa solevutaka ga na nodra siganisucu na gone, e vinaka qori ia e sega ga ni vakaibalebale vakataucoko vei keda na itaukei me vaka na itovo vakavanua e solevutaki kina na veitagede ni bula e curuma e dua na gone.

Sa dodonu me da lialiaci ka railesuva tale mada na vanua eda malumalumu kina ka me da vakavinakataka.

Au rawa ni tukuna, nida sa bula tiko qo ena dua na buturara ni ivalu, na ivalu me baleta na veika e vinaka kei na veika ca.

Sa levu na gacagaca ni veivakatorocaketaki sa curuma mai na noda lomanivale, e rawa ni kauta mai na vinaka, ia e rawa tale ga ni vakarusa na vuvale.

Sa bibi kina vei keda na ulunivuvale, meda vakatulewa vakayalomatau ena veika meda vakadonuya kei na veika meda vakatabuya.

Na itovo ni bula ena veisiga e rawarawa nida veitalanoataka, ia na kena bulataki e via dredre toka, ia sa tiko sara ga ena lomanivuvale, na mataqali kei na noda yavusa na kena bulataki na itovo vakaturaga me rawa ni bula kina na vanua.

Na vanua e bula tiko e lomada, sa qai vo ga meda vakila ka maroroa na kena itovo ena noda bula ni veisiga.

Sa vakamamasu ni Tabacakacaka iTaukei meda matanataka na itovo kei na ivakarau vakavanua era vakamareqeti kina na gone kei na marama, ka keitou vakabauta na veiqaravi ena Tabacakacaka iTaukei nida sa bulataka na itovo qori ena qai vakalougataki keda na Kalou baleta nida sa matanataka na nona loloma ena itovo ga e solia mai o Koya vei keda.

More Stories