Tabaka e 100 na sikoa ena rua na yabaki o Sivo

ESA tabaka rawa e 100 na sikoa ena loma ni rua ga na yabaki o Maika Sivo na cauravou ni Viti ka wigi tiko ena sotasota ni rakavi tinikatolu mai Ositerelia ena gauna qo.

Nai tukutuku oqo esa na rawa ni laveti ki na sotasota ni NRL ni dua e rawa ni tautauvata kei Semi Radradra, o Maika Sivo ena macawa sa oti e a tabaka rawa nai ka 100 ni nona sikoa ena loma ni 30 ga na vula na nona qito.

A laurai yani e Viti na cauravou qo o Sivo mai vei rau na veiwatini saravanua ena nodra vakacagicagi voli ena noda vanua ka rau kauti koya me laki qito ena timi ni Gundagai Club.

Ia, ena gauna qo o Sivo ka qito tiko ena Penrith Intrust Super Premiership esa tekivu me ra cicivi koya tiko yani na veikalavo ni NRL kei na unioni ni Super Rugby mai Ositerelia. Ia, ko Don kei Kathy Tuckwell e rau a kauti Sivo yani e Viti ki Ositerelia ena 2015 ena nodrau a raici koya ni a qito tiko ena gauna e rau vakacagicagi voli ena noda vanua.

O Sivo a qito tiko ena Momi Tigers ni bera ni qai konitarakitaki ena timi ni Mounties Rugby League Club ka qito tiko ena sotasota ni NSW Cup mai Sydney e Ositerelia.

Na totolo kei na kaukauwa e tiko vua e vakavuna me vesuka e levu na daunididigo ni qito mai Ositerelia ena nona qito tiko ena sotasota ni New South Wales Cup.

Ia, ena sotasota ni NRL ena macawa qo, e na sota tiko na timi ni Raiders kei na timi ni Storm ena veimama ni vitu (7:30pm) ena Vakarauwai.

More Stories