Susu maleya

KEIRAU kalougata vakalevu ni veivuke vei keirau na matanitu kei iratou na Tabana ni Qoliqoli e na kena keli e rua na neirau tobu ni susu ika kei na ikasusu (grasscup) e na neirau qele lisi ka rauta ni 26 na eka mai Waibau e Naitasiri.

E vakadeitaka mai na i tukutuku oqori o Jojivini Keresi e dua na marama ni Buca Bay mai Cakaudrove ka vakawati ki vei Rokora Nane Keresi, ka turaga talega ni Koroalau e Cakaudrove.

E kaya na marama ni (Buca Bay always nice) oqo ni rau kalougata vakalevu ni veiwatini, e na nodratou veivuke na Tabana ni Qoliqoli e na kena vakarautaki na nodrau tobu ni ika, na kena caka na paipo ka kena i usutu ni ratou solia wale na ika lalai me ra la’ki vakatawana na nodrau tobu.

‘Sa tiko e na neirau i tuvatuva me dua na cakacaka mamada me keirau vakaogai keirau tiko kina ni sa toso cake tiko na yabaki ni bula.

‘Me vaka ga ni keirau sa qase tiko mai ka keirau sa na sega ni rawa ni cakava e so na cakacaka bibi, me vaka na tei tavioka se tei dalo, ka keirau sa lokuca vata me keirau vakaogai keirau tu ga e na dua na cakacaka mamada.

‘Ia, keirau vakavinavinaka sara vakalevu tikoga vei iratrou na Tabana ni Qoliqoli e na nodratou vakadonua na neirau kerekere, ka keirau sa mai raica na kena vakavatukana e na gauna oqo,’ e kaya.

Tomana na marama yabaki 61 oqo ni rau a tekivu susu ika mai e na yabaki 2014, ka qai yacova mai na mua ni yabaki 2015, rau sa tekivu tatamusuki tale kina.

Kuria o Keresi ni matai ni nodrau tatamusiki oya na tobu e tiko kina e 4000 na maleya ka rau volitaka mai na vula o Noveba ni 2015 ki na Janueri ni yabaki sa oti, ka rau qoqota kina e $13,600.77.

‘Keirau volivolitaki ga e na veimacawa e na loma ni vula tolu ka’u sa vakamacalataka toka oti oqori e cake ka’u vakavinavinaka vakalevu ni ra taleitaka na dau volivoli na volia na maleya bulabula ka ra se ribariba sara tu ga vakavinaka e na loma ni vokete vakarautaki.

‘Vei au e rawarawa toka na susuga na ikasusu (grasscup) ka ni kena kakana na co (paragrass) ka solia wale tu ga na Kalou Levu ko Jiova, ka ra bula tu ga vakaveitalia e na yasa ni tobu ni ika, ka keirau sega tale ni volia na kedra me vakataka na kedra kakana na maleya,’ e kaya.

Kuria o Keresi ni vakavinavinaka vakalevu vei ira na dau veidigitaki vei ira na dau teitei kei na susu ika ni bau digitaki o koya, ka rawata talega e dua na kena i cocovi ni marama dau susu ika duadua e na wasewase o Naitasiri, ka vakayacori tiko na kena soqo e na ruku ni wavu mai Nausori e na macawa sa oti.

Me vaka ga ni sa vakauqeti tiko me da kania vakalevu na kakana bulabula e na gauna oqo, me rawa ni vorata na mate sureti (NCD), sa tu gona kina na nona vakanuinui o Keresi ni na vakabalavutaka tiko na nodrau bula na Daunilewa, me rawa ni rau tomana tale tiko na cakacaka vinaka ka rau sa tekivuna tiko e na gauna oqo.

More Stories