Sotava na gagadre

VAKADEITAKA vei ira na tiko rawa ena bose bibi oqo mai Jamani na i liuliu ni noda matanitu ni sega ni dodonu vei ira na i liuliu ni veimatanitu mera na kua ni vakaweleweletaka na nodra i tavi kivei ira na lewenivanua.

E tukuna o Voreqe Bainimarama ni veika e sa yaco tu oqo ena noda vuravura, kei na revurevu ni draki veisau e kunei ni sa kaukauwa cake tikoga me vaka na cagilaba, na kama, na waluvu, na mamaca ni vanua, na kena waicala na wai cevata, e ra sa laki vakaleqa kina na veika bula eda vakakaravi kina na tamata me da na dau kana mai kina.

E tukuna talega vei ira na mata ni veimatanitu era tiko ena bose bibi oqo ni sa tukuna oti tiko o ira na kena dau ni yabaki 2016, e laurai ni sa qai tubu cake ga na kubou ka vakacacana na i lati ni noda vuravura.

E vakavinavinakataka na nona sa digitaki o Bainimarama me liutaka na matabose oqo ni COP23 ni oti na kena soli na i tavi oqo mai Morocco ena yabaki sa oti.

Tukuna ni sa tu na bolebole vei ira na i liuliu ni matanitu me ra na raica vata ni vakayacori na veika era sa yalataka ena veidinadinati mai Parisi ni bera na yabaki 2020 ena vuku ni draki veisau.

Na sasaga e sagai tiko ena bose ni COP 23 e gadrevi kina na nodra dinata ka veivuke na matanitu lelevu ena kena vakalailaitaki na iwiliwili ni kubou loaloa ka vakacacana na noda vuravura mai na vanua ni buli yaya e vuqa.

E kuria o Bainimarama ni sasaga oqo ena rawa ni vakavurea e so na daubuliyaya me ra bulia tale eso na misini kei na i yaya e sega ni vakavu leqa ena noda vuravura.

Na bose oqo mai Jamani, ena liutaka tiko na veitalanoa me baleta na bolebole gadrevi mai vei ira na matanitu ena veiyasai vuravura na mata ni noda matanitu o Nazhat Shameem.

E nuitaka na i liuliu ni noda matanitu ni ra na marautaka na veiqaravi nei Viti kei na veika era na laki veitalanoa ka veiwasei kina matailakolako yani ki Viti e Jamani ena loma ni rua na macawa ka tu mai.

E kuria o Bainimarama ni ra na rawa ni veitalanoa ka veiwasei ena yalo vinaka kei na galala na i liuliu ni veimatanitu e vuravura ena noda taqomaki na bilioni vakabilioni na laewei vuravura ena gauna oqo.

More Stories