Sota o Navua kei Waidina ena valataki ni Escott Shield

NA NODA Railesu e na macawa oqo eda na wilika kina na i talanoa ni nodrau a sota e na rakavi ko Navua kei Waidina e na yabaki 1968.

Ni tei wilika sara mada na i tukutuku e volai koto kina e na yabaki oya:

Ena nodrau a sota mai Navua e na Vakarauwai sa oti na timi ni rakavi ni Waidina kei Navua e ratou a qaqa kina na i taukei ni rara e na 6 kei 3 na poidi e rau dui rawata.

Na poidi oqo kei Navua e rawa mai na dua na i totogi, dua na sikoa kei na dua na ‘drop goal’.

A revari e na siga ko ya ko Suliasi Devo ka sinai sara na rara mai vei ira na sarasara, ka kena i matai ni gauna oqo me vakayacori kina mai Navua e dua na sotasota levu vaka oqo ni kena valataki tiko na i covi na Escott Trophy.

Oqo e se qai matai ni wavoki ni kena valataki na i covi ko ya.

A raici e na Vakarauwai ni dua na dau qito vinaka ko Savenaca mai Deuba, ia, e kena ca ga ni dau taura vakadede na polo.

E na i matai ni 15 na miniti e voleka ni tu ga e na nodratou yasana na Waidina na polo, ia e so na gauna e ratou a qai dau sauma vinaka vei iratou na timi ni Navua ni ratou dau cakava e vica na veisoli polo rairai totoka ka totolo.

Ni oti na i matai ni veimama e rawata e dua na caqe ni i totogi ko Savenaca mai na timi ni Navua.

E dau levu sara na nodratou polo vinaka na timi ni Waidina, ia e dau vakaleqa ga ni sega ni dau totolo sara na nodratou veipasi na i yatu e muri.

A voleka sara ni rawata e dua na sikoa ko Ratu Leone na naba 10 ni timi ni Waidina ka ni a rubilaka e dua na cici e na yasa ni laini ka mani kena seva ni a vesu koso.

Ni vo walega e lima na miniti ni oti na qito, e a qai taura na polo o Joe Roko na wigi balavu ni timi ni Navua, vakadodonu yani ki na yasa ni rara ni Waidina, ka tabaka sara.

Na siga tale ga oqori e rau a sota kina na timi ni Namosi kei na timi ni Serua ka qaqa kina na timi ni Namosi e na 11 kei 6.

Sa i koya oqo na timi ka doladola e na siga ko ya ka revari kina na Turaga Bete ko Father Carde.

Sa koto talega e ra oqo na yacadra na lewe ni timi e na sotasota e na siga o ya.

Navua:

Naturaga (Vunibau), Roko (Lomary), Sakealevu (Deuba), Savenaca (Deuba), Bale (Forestry), kana (Wainikoroiluva), Sairusi (Forestry), Josevata (Forestry) Veremo (Vunibau), Ikadroka (Vunibau), Valuone (Deuba), Tomasi (Nabukavesi), Dravunavanua (Deuba), Mosese (Vunibau) kei Nemia (Deuba).

Waidina:

Pio, Vilikesa, Muruka, Petero, Polino, Ratu Leone, Ratu Lasaro, Maika, Tikiko, Ratu Aca, Sakiusa, Daveta, Demesio, Penisoni kei Manoa.

More Stories