Sota na Naita

E RATOU sa na vakagalalataki talega na lewe ni timi ni Nadroga kei na timi ni Naitasiri ka ratou curu tiko ena timi ni Viti me ratou na qito ena macawa qo ena sota ni Farebrother Sullivan Cup.

Esa tu vakarau na timi ni yasana vakaturaga o Naitasiri me na bolea na timi jabeni ni Nadroga ena nodrau na sota tiko mai Lawaqa ena Vakarauwai qo.

E vakaraitaka o Koli Sewabu na dauniveivakatavulici ni timi ni Naitasiri ni ratou sa tu vakarau me ratou na sota kei na nodratou naita ena kena bolei na Farebrother Sullivan Cup.

Sa toso vinaka tiko na neitou vakavakarau ka ra bulabula vinaka na cauravou ena nodra sa vakanamata ena qito kei Nadroga, e kaya o Koli Sewabu.

E tukuna o Sewabu ni sa marautaka talega na nodratou sa lesu tale yani ki na timi ni Naitasiri ko Joeli Veitayaki, Mosese Ducivaki kei Frank Lomani ni oti na nodratou a lewena na timi qaqa ni Vodafone Flying Fijians ena qito kei Toga kei na sota kei Samoa.

Nuitaka ni ratou na rawa ni mai laveta cake tale na vakavakarau ena loma ni timi na nodratou lesu tale mai o Joeli Veitayaki, Mosese Ducivaki kei Frank Lomani, e kaya o Sewabu.

Ia, e vakaraitaka ko Pita Kedralevu na manidia ni timi ni Nadroga ni ratou na sega ni tukuna e dua na ka ena gauna qo ka ratou na qai laki vosa ga ena loma ni rara.

Keitou na timi ni Nadroga keitou sega ni via tukuna e dua na ka, keitou na qai lai vosa ga ena loma ni rara, e kaya o Kedralevu.

E kuria o Kedralevu ni rau sa mai keba tale tikoga ena gauna qo ena timi ni Nadroga ko Nemani Nagusa kei Eroni Vasiteri ka namaki me rau na qito tale tikoga ena Vakarauwai qo.

Au sa veisureti raraba tiko vei ira na lewei Nadroga Navosa mo ni mai vakadinadinataka tale e dua na qito vinaka ka savasava ena macawa qo e Lawaqa, e kaya o Kedralevu.

Nodrau sota o Nadroga kei Naitasiri ena vakayacori tiko ena 3 donu na kaloko (3pm) ena Lawaqa Park mai Sigatoka ena Vakarauwai qo.

More Stories