Sota kei na Ranadi o Konrote

Update: 10:56AM

E DUA na gauna marautaki vua na Ranadi mai Bolatagane, o Elisapeci na i karua na nodra mai sota kei na noda Peresitedi, o Major-General (Ret�d) Jioji Konrote, ena macawa sa oti.

Erau a laki veitalanoa ena vale vaka- Tui ka rogo e vuravura, na Buckingham Palace o Konrote kei na nona marama.

Ena nona veisiko ki Bolatagane, e a laki sota sara kei na Marama na Ranadi o Konrote ka tukuni ni marautaka vakalevu na nodrau veitalanoa na Ranadi.

E a vakaraitaka vua na Ranadi o Konrote na vanua e sa yaco tiko kina na veivakacokotaki e Viti, ni oti na vakacaca ni cagilaba o Winston ena vula o Veverueri.

Me vaka ni a dua talega na nodra cau na marama na Ranadi ena i lavo ni veivuke, a dolea kina e dua na vosa ni vakavinavinaka vua na noda Peresitedi.

Era se nanuma vinaka toka ga na Marama Bale na Ranadi na nodra a veisiko voli mai ki Viti ena i matai ni gauna oya ena 1953.

E a sega ni guilecava na Ranadi na nona vosa ni veivakacaucautaki me baleta na qaqa e ratou a mai rawata na noda toa ni vala ena i matai ni koula ka rawati mai na Rio Olympics ena vula o Okosita. E a laki gade ka veisiko voli mai Bolatagane na noda Peresitedi ena nona laki dolava e dua na i vakaraitaki cakacaka ni liga ena University of East Anglia ka laki sota talega kei ira na noda lewenivanua era sa veiqaravi ka cakacaka tu mai Peritania.

Ena gauna oqo e sa tiko voli mai na Tokalau e loma ka laki sikovi ira na noda liga ni wau ka ra veitaqomaki tu mai Sainiai kei Lepanoni.

More Stories