Solesolevaki na mataqali o Ailea ena tali ibe

NA ogaoga e na neitou loma ni koro e sa sega ni ceguvi rawa, ka vuna o ya keitou sa tekivuna kina na neitou vakaraitaki cakacaka ni liga e na mataqali,o Ailea e na koro ko Naviqiri, Navakasiga e na yasana ko Bua.
E kaya o Sera Draunimasi ni vakaraitaki cakacaka ni liga e na nodratou loma ni mataqali e se qai tekivu sara ga e na yabaki oqo me rawa ni ceguva na veioga e dau lavaki mai na vanua, lotu kei na matanitu.
Tomana ni sa tiko na nodratou i tuvatuva me ratou dau vakaraitaki cakacaka ni liga tiko e na veivula.
E kaya o Draunimasi ni vula ko Maji e ratou vakaraitaki cakacaka ni liga kina me baleta na nodratou mataqali, ka ratou sa lomavata kina me volitaki na ibe oya me rawa ni voli kina na nodratou i yaya ni kana ni mataqali.
Ia, e na vula sa dromu e donumaki iratou na marama ni mataqali oqo na Na i Lalakai, ena nodratou vakaraitaki cakacaka ni liga tiko me baleta ga na nodratou dui matavuvale. Kuria o Draunimasi ni ibe e ratou vakaraitaka tiko e na vula sa dromu, ni oti ga oya eratou na dui kauta tale ki na nodratou dui matavuvale.
Sa totoka dina na kedra i rairai na nodratou cakacaka ni liga na marama ni mataqali o Ailea e na kedra sekavula vinaka na ibe, kei na totoka na maqosa ni kedra i talitali.
E kaya o Draunimasi ni vakanananu e ratou bucina vata na marama ni mataqali o Ailea, e sega ni ka vou, ka ni ra a dau solesolevaki ga na noda qase e na gauna e liu me rawa ni rawati kina na tiko vinaka kei na bula veilomani.
Ia, na veisau ni bula e da sa sotava tiko e na gauna oqo, e sa dodonu ga kina me da vakatotomuri ira tale na noda qase e na gauna e liu me rawa ni vorati kina na bula dravudravua e da sa sotava tiko e na gauna oqo.
Tomana o Draunimasi ni o ira na luvedra gone yalewa era vuli tiko, era qai dau la’ki vakavulici e na gauna era sereki yani kina e na nodratou koro.
“Qo mada ga o ira na gone yalewa era se qai vakawati vou tiko mai e na loma ni neitou mataqali, era sa vakavulici sara tikoga e na cakacaka ni liga.
“Era marautaka sara ga vakalevu na vakasama ni vakaraitaki cakacaka ni liga, ka ra mai donumaka e na loma ni mataqali, ka ni vuqa vei ira era se qai mai tovolea sara talega vakadua na kena vakaraitaki e dua na ibe mai na caka voivoi me yacova sara na kena la’ki tali.
E dua na ka e matalia e na siga oya e na nodra vesuka vata e 20 se 30 na voivoi ka qai samu me vaka ga e dau tuki tiko na masi. E kaya o Draunimasi ni mataqali samu voivoi vakaoya e sega ni kania na gauna, ka sega talega ni kasere kina na voivoi.
Sa niutaka tiko o Draunimasi ni na dua na yabaki vinaka ni vakaraitaki cakacaka ni liga ki vei iratou na marama ni mataqali ko Ailea e na yabaki oqo.

More Stories