Solesolevaki e Vatoa

E SEGA ni dua na qasenivuli e lako mai me mai vakavulici keimami, qo na neimami dui kila sara ga vakataki keimami.

Oqori na nona i vakamacala o Ulamila Tuikaba na i liuliu ni soqosoqo vakamarama mai na koro ko Vatoa, Bau e na yasana o Tailevu.

E kaya o Tuikaba ni ra a bosea ga na i soqosoqo vakamarama e na nodratou koro me ra na vakayacora e dua na vakaraitaki cakacaka ni liga e na yabaki oqo.

Tomana ni ra bosea me ra wase vakatolu na marama ka rauta tiko ni 53 taucoko na kedra i wiliwili.

Ia, na bose e ra cakava mai na i tekivu ni yabaki, e sa mai vakavatukana e na siga Moniti.

“Na gauna keimami sa wase kina vakatolu, keimami sa qai lesia na neimami i liuliu ni soqosoqo ka vakakina na kena qasenivuli.

“Ia, au drukataka tale na cakacaka ni liga era sa mai vakaraitaka na marama e na siga e daidai e na kedra rairai totoka, ka vakauasivi ni sega mada ga ni dua na qasenivuli e gole mai me mai vakavulici keimami.

“Qo na dui kila lalai sara ga e tiko vei keimami, keimami sa mai vakaraitaka tiko oqo.

“E na siga Vakaraubuka ni macawa oqo, keimami sa na qai curuma yadudua kina na vale,” kaya o Tuikaba.

Tomana ni ra sureti ira ga na turaga me nodra vulagi dokai kei Salote Vatu na marama ni Cautata ka nodra dau ni vakasala na i soqosoqo vakamarama e na i Wasewase o Bau, lewe ni komiti talega e na yasana o Tailevu.

E kaya o Vatu ni vakavinavinakataki ira sara vajkalevu na i soqosoqo vakamarama e na koro ko vatoa e na nodra nanuma me ra sureti koya me nodra vulagi dokai.

Tomana ni sega tu ni dau vakaoqo na nodra i gu na marama e na gauna e liu, ia, na nona curuma ga na nodra vale ni marama e daidai, sa raica sara ga kina o Vatu na nodra yalovata na marama ni Vatoa, ka sa vakavinavinakataki ira sara ga vakalevu.

E kaya o Vatu ni sa tu na nona vakanuinui ni na laveti cake tale na i vakatagedegede ni nodra cakacaka ni liga na marama ni Vatoa, ka me ra vakavulici talega na kena i sausau vou me kakua kina ni cavuka na veika e ra sa vakaraitaka e na siga Moniti.

More Stories