Sevu ni marama me Sipika ni Palimedi

ENA macawa sa oti, e sa mai digitaki kina na i sevu ni marama e Viti me cabeta na i tutu ni Sipika ni noda Bose Lawa.

E marautaka vakalevu na nona i tutu vou oqo o Vuniwai Jiko Luveni, ka cavutu mai Ono-i-Lau ka dau Minisita ni Marama ni bera na veidigidigi levu ena Seviteba 17.

Ena nona mai taura oqo na i tutu ni Sipika ni Bose Lawa, e sa mai solia tani kina na nona dabedabe ka rawata ena veidigidigi ena ruku ni soqosoqo vakapolitiki na Fiji First.

E vakavinavinakataka talega na Sipika e liu, o Vuniwai Pita Nacuva na nona sa mai digitaki oqo o Luveni.

Ia, e dua na nona i vola o Nacuva ki na pepa vakavalagi, na Fiji Times e vakaraitaka kina ni tiko na i tuvatuva se na Standing Order naba 10, ka volai toka kina vakamatata ni veidigitaki ni Sipika era na qai digia ka vakatulewa kina na lewe 50 na lewe ni Palimedi vou ena i matai ni nodra dabe vata.

E na i matai ni nodra dabe vata talega oqo na lewe ni Palimedi vou, era na digitaka talega kina na i liuliu ni To ni Veisaqa.

Ia, e kaya o Nacuva ni oqo e dua na kalawa vou era sa vavaca yani na marama ena vuku ni tutu vakaveiliutaki ena noda matanitu, ka ni ra dau digitaki tu ga na turaga ena i tutu vakaoqo ena loma ni Bose Lawa.

E kaya o Vuniwai Nacuva ni dua na bolebole ena sotava o Vuniwai Luveni, oya na kena raici na i tovo ni veiba kei na veitalanoa ena loma ni Bose Lawa.

Tukuna talega ni na rawarawa na veiqaravi nei Luveni ke ra kila vinaka na i walewale ni veitalanoa e Palimedi na lewe ni Palimedi.

E namaki me na tekivu na Palimedi vou ena Moniti mai oqo, ka sa vakayacori ga na bose lawa ena loma ni Palimedi vou ena Vale ni Tabacakacaka e Suva.

Sa mai tara ka vakavoutaki na Vale ni Tabacakacaka me Palimedi ka dau vale ni veilewai tu e liu.

More Stories