Semati Viti ki Solomone

Update: 11:23AM MAI semati ga nai sema makawa me rawa ni matata vinaka tiko na veiwekani. Oya na veika e cauraka tiko ki na i Nai Lalakai ko Ilivasi Tabua na dauniveivakatavulici e liu ni timi ni Flying Fijians ena nona kauti iratou mai na timi ni Yatu Solomone ena nodratou mai vakaitavi tiko ena sotasota ni rakavi lewe ya vitu e Viti.

�Nai naki levu ga ni neitou mai qito qo me rawa ni vakatorocaketaki kina ko ira na wekada na Solomone ena rakavi ka muria tikoga mai na veiwekani makawa era a semata na noda qase,� e kaya o Tabua.

�Na veiwekani qo e veiwekani makawa, na kena vinakati me vakatoroicaketaki na qito rakavi vei ira na wekada qo na Solomone, me keitou sureti ira mai na sa mai tiko rawa e Viti me ra mai qito vata kei na timi au kauta tiko mai oqo.

Ena 1500 na yabaki sa oti era a tiko vata kei ira na noda qase ena veidela ni yavu mai Nakauvadra ko ira na wekada qo na Solomone. Ra mai tiko saraga ena loma ni vale. Era liga tabu ni veiqaravi e loma ni vale.

�Ra tiko mai na yasana o Ra ko ira na Solomone ka dua talega na kena i tukutuku ena nodrau gole yani o Rakavono kei Ratu Vaula ki Yareyare mai Solomone ka rau mani raica e dua na marama tabusiga, ka rau kauti koya mai kina na marama ya. Era sa levu tu oqo na kawa ni marama qo i Viti, Era tiko mai Namara eso na kena kawa, Kadavu, na veiwekani gona oya ka sa vinakati me mai vakaukauwataki tale ena rakavi.

Levu na gauna e basika na veidusi ka tukuni kai Solomone se kai kaqo, ia eda sega tiko ni kila ni da dua tikoga na vuvale levu.� 

E kuria o Tabua ni nodrai lakolako na qase e dua ga mai na i sema ni lakolako ni veiwekani ka sa dodonu ena kena vinakati me vakavinakataki, keitou sa mani nanuma kina me na vakayagataki na qito rakavi me tara cake tale na sema ni veiwekani qo.

�Ni matata na vanua o yavutu mai kina ena rawarawa sara na i sema ni nomu na qitora na rakavi. Na noqu tiko qo mai Solomone, au raica rawa na matata ni nodra i sema ki na nodra yavutu ka ra vakabibitaka na nodra i vakarau.

Au kila ni sa kena gauna qo me sa vakamatatataki keda kina ena keda i sema ni noda veiwekani. Vakabibi vei ira na wekada na Solomone era tiko ena noda vanua.�

Na ilawalawa gone era gole mai qo era gole ga mai na veiyanuyanu e Solomone, kei na so era tikitiki Toga se Polinisia ka ra vakoro tiko mai Solomone.

�Au vakabauta ena qito vakaoqo ena vakayacori ena yabaki mai oqo esa na levu sara na vuvale ka ra dra vakasolomone era na mai tokona na i sema ni veiwekani qo ena qito rakavi.

A vakayacori na sotasota ni Soltuna 7s ena rara ni qito e na Univesiti ni Ceva ni Pasivika ka ra mai vakaitavi kina na dauqito ka ra dra Solomone ena noda vanua. A mai qito kina na timi mai Caubati, na veikoro vaka Solomone ka ra tiko e Wailoku kei na veivanua tale e Viti. 

Ni namaka talega na timi ni Solomone qo ena vakaitavi tiko ena sotasota ni Marist 7s ena mua ni macawa qo.

More Stories