Semanasuivuca e Nasiriti

E LEVU na i solisoli e dau tu vei ira na tukada ena gauna e liu e vaka me sa yali tiko yani vakamalua ena nodra nanuma eso ni sa sega ni yaga ena gauna qo ka ni sa tiko na valenibula kei na mataqali veiqaravi vou esa tiko ena nodra vanua ka ra vulici vakaivola.

Ia, e dua na i solisoli levu e tiko vei iratou mai Nasiriti ena loma ni tikina o Nabobuco ena loma ni yasana o Naitasiri na kena dau semati na sui.

E vakaraitaka ko Poasa Naleba ni o koya saraga na dau sema sui mai na koro o Nasiriti ka se cakava tikoga na veiqaravi qo me yacova mai nikua.

“Au dau vakayagataka e dua na mataqali draunikau me?u dau ubia kina na sui e kamusu ka vakavadretitaka,” e kaya o Naleba.

E tukuna o Naleba ni draunikau qo e dau kauta mai ka mai musumusuka vakamatailalai ni bera ni qai vakayagataka e na sui sa kamusu tu.

“Na yaca e vakatokai tiko vei au ko Semanasuivuca oya ena noqu i solisoli ni dau sema sui,” e kaya o Naleba.

E tomana o Naleba ni levu sara na cauravou dauqito e kamusu na nodra sui ena gauna ni qito esa semata oti na nodra mavoa ka ra sa tu vinaka tale tu ena gauna qo.

“Au a semata talega na yava ni ose ena gauna e kamusu kina ka sa qai vinaka tale na ose ka cakacaka tale,” e kaya o Naleba.

E tukuna o Naleba ni mataqali veiqaravi vakaoqo ena loma ni vanua ka ni yawa sara mai ki Suva ka sa rawarawa ni i solisoli qo e solia na Kalou vei keda me da vakayagataka ka biuta vata koto na kena veidrauni kau kei na kau vakaviti me da bula vinaka kina kevaka walega me da na vakamuria vakavinaka na veika e vinakata na Kalou vei keda.

A vakadinadinataka na Nai Lalakai ena nona a vakaraitaka ko Salimoni Kaniwi e dua na turaga ka a bula talega mai na kamusu ni yavana ni a semata ga ko Semanasuivuca ena koro o Nasiriti.

More Stories