Sega ni taro bibi me na tarogi

E sega ni qai taroga e Palimedi na nona taro me baleta na lailai ni wainimate ena noda valenibula o Parofesa Biman Prasad ni mai tekivu na bose lawa ena siga Moniti.

A mai vakatauca na nona lewa o Doketa Jiko Luveni, na Sipika e Palimedi ni sega ni taro bibi na kena oya, baleta ni ulutaga oqo e dua na ka e sa veitalanoataki ka sa yaco tiko mai vakadede.

E a biuta cake na nona taro o Parofesa Biman, me rawa ni vakamatatataka na tikina oqo na Minisita ni Bula o Rosy Akbar ena loma ni bose lawa.

E taura rawa na tabana ni tukutuku, ni sa lailai tikoga na wainimate ka dau gadrevi vakalevu ena noda veivalenibula, ka vakauasivi ena valeniwai ena valenibula levu e Suva.

Ia, ni tarogi na Minisita ni Bula o Akbar ni oti na bose, e veivakadeitaki na marama minisita ni sa na dua na nona i vakamacala ena tikina bibi oqo ena macawa oqo.

E laurai ni levu sara tiko na dredre e sotavi tiko ena kena dau otataki mai na wainimate kei na kena veivotayaki ena valenibula ena noda vanua.

E a biuta cake na nona taro oqo o Biman Prasad ni bera e dua na aua me tekivu na bose me vaka e virikotori tu ena i Vakarau ni Bose e Palimedi.

More Stories