Sega ni matata

E SEGA ni sauma vakavinaka na taro me baleta na kena sa vakatabui na soli ni vakamalua na Minisita ni Qoliqoli o Osea Naiqamu e na Palimedi enanoa.

E a taroga e dua na lewe ni To ni Veisaqa o Niko Nawaikula vei Naiqamu me vakamacalataka se na lawa cava e Viti e vakavuna me vakatabui kina vei ira na i taukei me ra na taura kina e dua na i vakamalua ena kena vakayagataki na nodra i qoliqoli.

Ena nona sauma na taro oqo na Minisita ni Qoliqoli, e mani biliga na taro o Naiqamu ki vua na Vunilawa o Aiyaz Saiyed- Khaiyum me vaka ni sega ni kena dau e na veika me baleta lawa o koya.

Sauma lesu o Naiqamu ni taro oqo mai vei Nawaikula e vauca na lawa, me vaka ni sega ni kenadau ena lawa o koya, e dodonu me na sauma kina na mataqali taro vakaoqo o Khaiyum.

E taroga talega o Nawaikula se o cei e biuta vata na i vakaro vou oqo ni matanitu.

E laurai talega ni vaka me sega ni dei o Naiqamu ena nona via sauma na taro veisemati kei na ulutaga oqo.

E dusimaka o Nawaikula ni sega ni kila o Naiqamu na veika e tukuna tiko, ka rairai talega ni sega ni o koya dina e cakava mai na lawa oqo- ni sa vakatabui na soli ni vakamalua vei ira na i taukei ni qele.

E vica tale na taro me lako vata kei na ulutaga e veivosakitaki, ia, e a sauma lesu ga o Naiqamu ni sega ni oka na veitaro oqori kei na ulutaga e veitalanoataki tiko (irrelevant). A taroga vua o Mosese Bulitavo se vakasama cava e vakavuna na nodratou biuta kina na vakatulewa oqo na matanitu, oya me sa kua ni soli e dua na i vakamalua vei ira na i taukei ni qoliqoli.

A sauma ga ena dua na i yatu vosa o Naiqamu ena nona kaya ni sega ni oka na taro oqori kei na veitalanoa e veivosakitaki tiko (irrelevant).

E na vula sa oti a mai vakaraitaka o Naiqamu na lewa ni matanitu me sa kua ni dau soli tiko vei ira na i taukei ni qoliqoli e Viti na i vakamalua me vaka ni cala vakalawa.

E laurai ni levu sara na i taukei ni qoliqoli ena veiyasai Viti, era kauwai ena veika e sa cakava oqo na matanitu me vaka ni sa kauta laivi na nodra i vurevure vakailavo.

Eso era dau vakayagataka na i lavo ni vakamalua oqori me qaravi kina na veika era qarava vata vaka mataqali se yavusa me vaka na sikolosivi ni vuli. Ia, eso na i taukei ni qoliqoli era sega sara ga ni rawa i lavo kina, ka ra solia ga na nodra veivakadonui vakaivola kevaka e tiko na nodra lawa ni qoli, idinicavu kei na waqa.

Era ririkotaka eso na i taukei ni qoliqoli vakabibi e na muaira ni noda vanua ni oqo e dua na sasaga me na tauri kina na nodra i qoliqoli e na vuku ni yaubula e koto e na boto ni sauloa me vaka a sa vakaraitaka tiko e na yabaki sa oti na Gone turaga na Tu Navitilevu o Ratu Meli Bolobolo ni bera nira mai bale. Era a dua vei ira na lewe ni dairekita ni Matabose ni Qele Maroroi ni bera nira a mai vakacegui.

More Stories