Sega ni dua na ulubale:Rabuka

E SEGA sara ga ni dodonu me dua na i ulubale e ratou solia na matanitu e na kena bera na nodra vukei na yasayasa vaka-Ra, e na vuku ni i drodro ni cagilaba se waluvu ka a tarai ira e na macawa sa oti.

E na dua na i tukutuku nei Sitiveni Rabuka na i liuliu ni i Soqosoqo na Social Democratic Liberal Party (SODELPA), ka noda Paraiminisita vakacegu, e tukuna kina na nona lolositaki iratou na matavuvale ni lewe lima na lewe ni vanua, ka a vakayali na nodratou bula e na Siga Tabu, e na vuku ni cava o Josie.

E kaya o Rabuka ni sa rui berabera na nodratou vakarautaka na matanitu na vanua ni i drodro, ka sega sara ga ni mai dua na i ulubale vinaka.

Na vuna baleta na nona a vagalalataki ira na veitabana ni matanitu oqo ko Bainimara, ka dodonu me ra tu vakarau e na veigauna kece e tarai keda kina e dua na leqa tubukoso.

O ira na veitabana ni matanitu oqo e okati kina na Department of Hurricane Relief, na Rural Housing, na Public Works Department (PWD), kei na Government Supplies.

Kaya o Rabuka ni kevaka era tiko kece na tabana ka sa bokoca na noda Paraiminisita, ena sega ni ra sotava na dredre na wekada mai na yasayasa vaka-Ra.

Tomana o Rabuka ni i tavi ni matanitu me liu taumada e na vanua e tarai ira na leqa tubukoso e na veigauna kece e yaco kina ena noda vanua.

Kuria ni o ira na veisoqosoqo (private sector), e rawa ni ra dodoliga talega mai e na mataqali veivuke vakatotolo vakaoqo, ia, e dodonu ga me liutaka tiko na matanitu na veika kece e gadrevi taumada.

More Stories