Sega ni dua e sivia ni sota na Pasivika

ERA SEGA ni viakila na tau bi ni uca e na siga Vakarauwai ni macawa sa oti na i lala Tabagone ni wasa Pasivika ka ra a keba macawa dua tiko mai Davuilevu, e na nodra dui vakaraitaka na nodra dui vakatasuasua kei na i tovo vakavanua ka ra dui kilaitani kina mai na nodra vanua.

Kaya nai Liuliu ni mataveitokani e na noda vanua o Talatala Joeli Mawi ni dodonu me ra a tayabe e na tauni mai Nausori na mataveitokani e na mataka lailai ni siga oya, ia, ni sa taubi tikoga na uca e sa qai mani daro kina, ka me ra sa laki vakaraitaki vukivuki ga e na nodra rara na vuli Vakatawa mai Davuilevu.

Ea tekivu taki ga na soqo e na mataka ni siga oya e na veiqaraqaravi vakavanua ka vakayacori vua na Minisita ni Qito o Laisenia Tuitubou, mai dua yani na kena lotu lekaleka ni bera ni ra qai vakatasuasua na vei wasewase.

E matalau ka sega ga na kete ni dredre ni rau sa vakatasuasua na matanitu e rua o Toga kei Samoa, kei na veisolevuti era a qai vakayacora vata kei na nodra i caba e na noda vanua oqo o Viti.

Ni oti na nodratou vakatasuasua na matanitu e rua oqo, e ra sa qai veitaravi yani na noda vei wasewase ni mataveitokani e na veivakamarautaki, ka ra lade talega e loma ni rara na goneyalewa ni Toga Matanisiga e na gauna e sa bula kina na nodra meke na cauravou i Taukei.

Tomana o Talatala Mawi ni ra a qai kumuna rawa ena basa ena siga Vakarauwai oya e $19,000.00 oya ni ra vakaitavi na i wasewase lelevu e na $500.00 ka $300.00 na i wasewase lalai.

Ia, e na bogi ni Siga Tabu era a qai lagalaga sere ni Siga ni Sucu ni bera ni ra qai mai veisukayaki yani e na mataka ni siga Moniti.

Tinia ga o Talatala Mawi ni dua dina na macawa ni vuli vinaka vei ira na i Tabagone e na veiyasai Viti ka ra sa nanamaki tu yani ki Toga Matanisiga e na yabaki 2016.

More Stories