Sega na veisisivi sere

ENA sega tiko ni vakayacori na veisisivi sere ia e na caka tikoga na lagalaga sere ka na lagati tiko e levu na sere vou e na soqo levu ni Jiupili koula qo.

E vakadeitaka na tikina oqo ko Nai Talatala Tevita Nawadra na Vunivola levu ni Lotu Wesele e Viti kei Rotuma ena soqo ni Jiupili Koula ka sa vakavakarau tiko kina qo na lotu.

Esa taucoko sara tiko ena gauna qo na nodratou vakavakarau na Lotu Wesele e Viti kei Rotuma e na vuku ni kena marautaki na Jiupili Koula ni Lotu ka na vakayacori tiko na kena soqo e Suva. Esa vo vinaka tiko qo e dua macawa me na qai vakayacori na soqo levu qo ka na vakayacori tiko na lotu e na i ka 17 ni Okosita ena Vodafone Arena e Suva. Mai na i ka 18 ni siga ya e na Moniti esa na dewa ki na Furnival Park mai Turaki na soqo levu ni lotu qo.

Na soqo ni marau qo esa na tarava sara tiko mai na Bose ko Viti oya mai na i ka 25 kina i ka 29 ni Okosita.

E tomana ko Nawadra ni ra sa tiko na vulagi sureti kei ira na lako ga mai e na nodra vinakata me ra mai tiko e na soqo lagilagi qo ka ra gole mai valagi.

Keitou na qaravi ira na neitou vulagi ka keitou sureti ira oya e na nodra vakaicilitaki kei na veika kece sara me baleti ira, e kaya o Nawadra.

Tomana o Nawadra ka kaya ni o ira na lako mai era na mai tiko e na soqo lagilagi qo era gole sara mai na Ceva kei Korea, Igiladi, Amerika, Ositerelia, Papua Niu Kini, Niu Siladi, Solomone, Toga.

E dua talega na ka bibi e na vakayacori e na soqo qo oya na nodra na vakasavasavataki ira na i Talatala ni lotu ki vei ira na lewe ni lotu. E kaya o Nawadra ni na liutaka tiko na veivakasavasavataki qo ko Talatala Qase kei na nona i vukevuke. Era na soqovi tale tikoga na matanitu Vanua ko Kubuna, Burebasaga kei Tovata.

More Stories