Sega na vakusakusa: Bainimarama

Update: 9:53AM ESA mai vakacavara na matanitu na kena vakacokotaki e rauta ni 20 na koronivuli e Viti era mai vakacacani ena cagilaba o Winston ena yabaki sa oti.

E namaki me ra na vakacavari talega e 148 tale na veikoronivuli. E mai vakaraitaka tiko na veika oqori na i liuliu ni matantu, Voreqe Bainimarama ni oti na nona dolava na valenivuli vou e Naiyala High School mai Wainibuka ena siga Moniti.

Vakadeitaka talega o Bainimarama ni tomana talega na Tabacakacaka ni Vuli na kena vakacokotaki e rauta ni 143 na koronivuli, ka sa vakacavari e 175 na koronivuli, oqo na koronivuli e mai vakacacani ga vakalailai.

Vakadeitaka o Bainimarama ni dina ni kerei mai na i lavo me vakayacori kina na veivakacokotaki oqo, ia e sa dua na tuvatuva e vinaka ka dei.

E rauta ni $170 na milioni na i sau vakailavo ni kena vakavinakataki na veikoronivuli kece e Viti era mai vakacacani ena cagilaba.

E namaki me na laki dolava tale o Bainimarama e 17 na valenivuli ena veiyasai Viti, e Nailega, mai Naseyani e Ra, qo ena veiyasana e Viti era vakila na kena koronivuli na vakacaca ni cagilaba.

E kaya ni sega ni via vakusakusa na matanitu ena kena cokonaki na koronivuli, ia e gadrevi ga me ra na tara vakavinaka ka me na rawa talega ni tudei na valenivuli oqo ena gauna e na ravu tale mai kina e dua na cagilaba kaukauwa e Viti.

Tukuna o Bainimarama ni kena sagai me na vakavinakataki na nodra vale ni vuli na gonevuli, me rawa kina ni ra vuli ka tosoya vinaka na nodra vuli ka na gonevuli me vaka na i naki ni nodra mai vuli.

E vakavinavinakataka talega na veivuke mai ni World Bank kei na Asian Development Bank ena nodrau mai cakacaka vata kei na matanitu e Viti.

Na valeni uli oqo e Naiyala High School e tiko na kena i sau vakailavo ena $340,000.

More Stories