Sa lala mai na delaniyavu

Update: 10:39AM ESA lala mai na veidelaniyavu mai Lau ena gauna oqo, ena kena vakasaqarai na cakacaka kei na vuli ena loma ni veitaoni lelevu e Viti.

Oqori e dua na ulutaga kei na kauwai e sa sega walega ni nodratou kauwai mai Lau, e sa tarai ira kece saraga na veiyasana tale eso, era tu ena veiyanuyanu.

Oqori e dua na bolebole e sega walega ni sotava na valenivolavola ni yasana o Lau, e dua na bolebole e ratou sa kila tale tikoga na Tabacakacaka iTaukei.

Vakadeitaka mai na Roko Tui Lau, o Ratu Paula Delaivuna ni sega ni dua na kena i wali rawarawa na kena oqo.

�Io, na itutu vakavanua talega, e sa levu era sa sega ni vakatawana tu na i tutu ni liuliu ni tokatoka, na i liuliu ni mataqali, ka sa 60 na pasede na i tutu vakavanua vakaoqori e sa vakatawani tiko e na loma ni yasana.

E rauta ni 13 na tikina ena loma ni yasana oqo ka mai vakayacori ena macawa sa oti na nodra bose ni yasana ena Studio 6 e Suva.

E na macawa oqo, e vakayacori tale tikoga na vuli vei ira na mata ni tikina, vei ira na mata ni tabagone kei na marama ena kena sagai me vakatoroicaketaki na nodra kilaka kei na veiqaravi mai vanua.

� E namaki talega me ratou na dabe vata na masi ni vanua ena macawa qo ena kena vakayacori vei ira na vuli ni veiliutaki vinaka kei na bibi ni kena vakatawani tiko na itutu vakavanua ka mera maroroi vinaka tiko na lewenivanua,� e kaya o Ratu Paula.

E na macawa sa oti, e levu talega na i tuvatuva e sa tuvalaka koto na matanitu ena kena veitabana duidui ena vuku ni veivakatoroicaketaki, na draki veisau, na tabana ni vuli, na veivakatoroicaketaki vei ira na marama kei na i tabagone.

E namaki talega me na qai dua na macala ni veitalanoa me baleta na kena vakatwani na i tutu ni Tui Nayau ka sa mai lala toka yani vakadede ni oti na nodra mai bale na turaga na Peresitedi vakacegu ka liuliu ni matanitu ena noda vanua, o Ratu Sir Kamisese Mara.

More Stories