Sa beitaki o Bulitavu

Update: 11:58AM ESA na vakayalia na nona i dabedabe vaka mata ena SODELPA mai na i To ni Veisaqa, o Mosese Bulitavu e na Moniti, ni a beitaki e na cala ni vakacaca e na mataveilewai e Suva.

E rau sa beitaki vata o Bulitavu, kei na peresitedi ni i Soqosoqo na Fiji United Freedom Party, ka daunibisinisi o Jagath Karunaratne e na nodrau vola e so na vosa tawakilikili e na vava (billboards) ni vakatakilakila ka dau tuvani tu e na veigaunisala e na noda Viti, e na yabaki 2011.

Na boroboro oqo e vakayacori e na kena vava mai na maliwa ni vanua o Suva kei Nausori e na veivosa ka rawa ni vakavuna na tiko yavavala ena noda vanua ka coqai kina vakaukauwa na matanitu.

Na veika oqo e yaco tiko mai na maliwa ni i matai ni siga ki na i ka ruasagavulu ka vitu ni siga ni vula ko Okosita e na yabaki vata ga oya. E vakatauca na  nona lewa e na Moniti o Marama ni Lewa Deepika Prasad, ka na qai vakatauca na kedrau i totogi e na i ka 19 ni siga ni vula mai oqo

E nona loya o Bulitavu ko Barbara Malimali, ka matataki Karunaratne o Aman Singh.

Sa vakavinavinaka sara vakalevu ko Bulitavu ki vei kemuni kece sara na lewe i Viti, ko ni dau tokoni koya e na gauna e waraka tiko kina me tau na kedrau i totogi, ka sa yalataka talega ni na sega ni veisisivi tale ena veidigidigi ni yabaki oqo.

Sa vakadeitaka talega na i liuliu ni veidigidigi o Mohammed Saneem, ni na sosomitaki Bulitavu tiko e na loma ni Palimedi e na gauna oqo, e dua na mata ka duri mai na SODELPA ena veidigidigi ni 2014.

More Stories