Rui ka bibi noda vosa

E DINA ni oti e 19 na yabaki na tu mai Merika, ia, e se madila vinaka ga e na vosa ni nona vanua.

E kaya o Asaeli Cava, yabaki 70, ni na sega ni dau guilecavi vakarawarawa na vosa ni nona vanua dina e Tavuki, Kadavu ka dina ga ni sa laki dede na nona tu mai vanuatani.

Dau kasa dei tu ga vei au na vosa ni noqu vanua baleta niu kai Viti, e kaya.

Kuria ka kaya ni vanua e tiko kina, o koya duadua ga na kena kai Viti ka sega ni raica o koya e dua na leqa e na vuku ni nona maroroya dei na vosa dina ni nona vanua.

Au vakaitikotiko e Long Beach, Long Island e New York ka sa dau vosa tu ga vakavavalagi e na veisiga, e kaya.

E sa yabaki 17 na nona cakacaka vakadraiva ni basi vei ira na gonevuli e kea e na Guardian Bus Company Ins e Oceanside, Long Island e New York

E sega ga ni dua na ka e uasivita na bula e Viti. Sa rui sau levu e kea na i sau ni vale, ia, na kakana e sau vinaka sara, e kaya.

E kaya ni dau solia na matanitu na kakana ka vaka kina na veimatalotu.

Ia, e vakaraitaka vakabibi o koya ni dodonu ki vei kemuni na gole ki valagi mo ni dau maroroi deivaki na nomu vosa.

O koya keirau veivolekati e rauta ni veimama na auwa na draiva na keirau veiyawaki.

Levu na kai Viti era vakaitikotiko e San Francisco, Sacramento, Carlifornia, Los Angeles ka sa vaka ga e Suva e na veisotari tu ga.

Meu guilecava vakacava na noqu vosa?

Kaya o koya ni dau vosa vei iratou na makubuna era tu mai Ositerelia era sa dau vosa ga mai vakavavalagi.

Ia, o au vosa tu ga yani vaka Kadavu.

Au tukuna vei ira mera tukuna vei ira na dui tamadra me vakavulici ira na vosa vaka Kadavu se vaka Viti.

Na nona veisiko mai oqo e ratou a kerei koya na luvena me mai caka e Viti na nona Siga ni Sucu ni sa yacova na yabaki 70 me vaka ni ratou tu veiyawaki.

E a vakayacori e na Vineyard na soqo ni nona Siga ni Sucu ka ra tiko rawa kina e sivia na lewe 200 e na Siga Tabu.

E ono na luvena na turaga ni Kadavu qo, ka  32  taucoko na makubuna ka tolu na makubuna vakarua.

More Stories