Rua na kaci

E MAI tuberi e dua na kamunaga mai vei iratou na yavusa Ratu ka ra tubera kina na Tui Nabou , Semi Matalau ki na matanitu o Bau me vakarogotaki ki na yavusa Tui Kaba ni ra sa bulia ka vakatikora oti na Roko Tui Bau.

Oqo na kena sa vakayacori oti na veiqaravi vakalotu e valenilotu ka sa qaravi tiko na veika vakavanua ena loma ni rara e na yanuyanu mai Bau ena Vakarauwai sa oti.

Ni oti na nona vakacacabo na turaga Tui Nabou mai na koro vakaturaga o Natogadravu, o Matalau mai na yavusa Ratu, a kaciva o Ratu George Kadavulevu Cakobau me ciqoma na kamunaga, ka mani seva ni a la?ki soli vakadodonu ki vua na tacidra, o Ratu Epenisa Cakobau.

A mani vakatarogi na Turaga na Masau Ratu Kinijoji Toganivalu ena vuku ni veika oqo, ka mani vakaraitaka mai ki na Nai Lalakai ni rairai beka esa nodra lewa na Turaga Tunitoga me na ciqoma na kamunaga ko Ratu Epenisa ka gunuva talega na yaqona vakaturaga.

?Na yavusa Ratu ena sega ni rawa ni vosa e na veika e yaco oya e rairai e ratou sa lewa beka ga na Turaga Na Tunitoga,? e kaya o Toganivalu.

Ia, e a qai vakaraitaka na Tui Nabou ena gauna a vakacacabo oti kina, ni rau a kaciva ruarua na kamunaga na turaga veitacini, ko Ratu George Kadavuleu Cakobau kei Ratu Epenisa Cakobau.

?Ena noqu raici rau na veitacini me tekivu mai na nona vakacabora e dua na kamunaga e liu na turaga Paraiminisita kei na kena au a qai vakacabora e muri, au dikeva na vanua e rau dabe toka kina ni a volekata toka na yasadra na Roko Tui Bau ko Ratu Epenisa ia ko Ratu George e toka yawa toka yani ena tutu ni vakatunuloa,? e kaya o Matalau.

E tomana na nodra vakamacala na Tui Nabou ni a mani rai yani vua na Turaga na Tunitoga ka mani dusi Ratu Epenisa me sa soli vua na kamunaga.

?Ni sa vakayacori na dabe vakavanua ena laurai saraga vakabibi ena matanitu o Bau vei koya na turaga e dabe tikiva na Roko Tui Bau esa na soli ga kina na kamunaga,? e kaya o Matalau.

E kuria o Matalau ni gauna e vakayacori tiko kina na vakacabo kamunaga e sa vakaraitaki sara tikoga ena vosa ni tubetube na kena gadrevi me tawani nai tutu vaka vunivalu Tui Kaba.

?Me da masulaka ga me na cabe na gauna vinaka kei Kubuna ena veisiga ni mataka,? e kaya o Matalau.

Era mai soqoni vata kina na veiwekani vakavanua, kei ira na vulagi sureti ena vuku ni soqo ni nodra sa mai buli o Ratu Timoci Taniela ki na i tutu ni Roko Tui Bau.

Ka sa mai liutaka kina na Yavusa Ratu o Ratu Timoci ni oti na veivakadeitaki vakamatanitu kei na kena soqo vakavanua ena mua ni macawa sa oti.

Kuri ni talanoa ni veibuli mai Bau ena tabana e 10-11.

More Stories