Rawaca ena timi ni La Rochelle mai Varanise

E KIDROATAKA ko Patrice Collazo na dauniveivakatavulici ni timi ni La Rochelle mai Varanise na nona sa vakaraitaka na valenivolavola ni mata ni Varanise e Viti na i sema e sa mai cakava o Savenaca Rawaca ena timi qo.

Ena nona a vakatarogi o Collazo mai na tabana ni i tukutuku mai Varanise e tukuna o koya, kevaka e dua na qaqa ni Olympic e gadreva na i vola tara ni curu vanua ki na timi ni La Rochelle, ena marautaka sara vakalevu me ratou na veiqaravi vaka kina. E vakabauta o Collao na i tukutuku oya ka sa tekivu me dikeva vakamalua tiko.

Ia, e vakaraitaka na valenivolavola ni rakavi unioni ena noda vanua (Fiji Rugby Union) ni ratou sa kila na veika me baleta na veitalanoa qo.

A vakaraitaka talega ko John O?connor na vakalesilesi liu ni FRU ni kevaka e dua na dauqito e Viti me na ciqoma e dua na konitaraki mai valagi ena dodonu me na kerea na veivakadonui mai na FRU.

Ia, a laurai o Rawaca ena macawa sa oti ena valenivolavola ni mata ni matanitu o Varanise e Viti ena nona la?ki biuta na nona i vola curu vanua ka rau mani veitalanoa kei Michael Djokovic na mata ni matanitu o Varanise e na noda vanua.

A vakadeitaka talega na valenivolavola ni mata ni matanitu o Varanise e Viti ni sa vakaraitaka o Rawaca ni sa ciqoma na veidinadinati kei na timi ni La Rochelle ka vakavuna kina me sega ni ciqoma na nodratou via tauri koya na timi ni Saracens mai Igiladi.

Ena namaki me na la?ki qito vata kei Levani Botia, Kini Murimurivalu ko Rawaca ena timi ni La Rochelle.

More Stories