Rawa ni vuna na kena sega ni qarauni na kakana

VAKADEITAKA o Vuniwai Isimeli Tukana ni rawa ni vakavuna na tubu ni gone e sega ni bulabula tiko na nodra dra ena kena laurai ni levu na marama era sa laki cakacaka ena gauna oqo e Viti.

E kuria o Vuniwai Tukana ni rawa ni levu na kisi ni gone e sa laurai vei ira na mate oqo na ‘ anaemia’ baleta ni sa sega ni ra raica na marama tina na kakana era kania ena veisiga na luvedra.

E vakabibitaka o Vuniwai Tukana ni ka bibi me na vakadreti vei ira na marama dauveiqaravi na bibi ni nodra vakani vakavinaka na gone ena kakana bulabula.

E kaya o Vuniwai Tukana ni dodonu me na kania tiko na draunikau bulabula na vuvale ena veisiga, me vaka na bele, na rourou se ota, na tubua.

E kuria ni rauta ni 75 na pasede na gone e Viti e lailai na nodra bula mai na yabaki 2 e sa laurai tiko vei ira na leqa oqo, oya na lailai ni dra bulabula ena yagodra.

E vakabibitaka o Tukana ni sa tiko saraga na digidigi ki na veivuvale kei ira na tina ena kena vakabibitaki na nodra kania na kakana bulabula na vuvale ena veisiga kece.

E dua talega na vakadidike e vakayacori ena 2014 ki na 2015 e laurai ni levu na vuvale e Viti era sa katalau ga ena madrai, bisikete kei na poreti ena veigauna kece.

E sa veisau sara mai na i walewale ni katalau e dau vakayacori tu e liu ena kena dau coi ni ti na tavioka, na dalo, na kumala, se uvi.

More Stories