Ravuti Kadavu na ualoka

ERA qai kidacala na lewenikoro mai Tabuya e Nabukelevu, Kadavu ena kena sa cabe yani na loka ena nodra I tikotiko kei na koro ena Siga Tabu.

Eso vei ira na lewenikoro era sa laki vakarurugi ena i tikotiko vagalala ni oti na kena cabeti ira yani e rua ualoka.

Tukuni na kena i tukutuku ni so vei ira na gone era sa laki vakaruru tiko ena tolu na vale mai na i tikotiko o Nabale.

Tukuna o Ipieli Cokanasiga ni matai ni ualoka e cabe mai ni rauta na 4 na kaloko na mataka lailai, na kena i karua e cabe mai ena 5 na kaloko, ena gauna era se moce tu kina na lewenikoro.

E dua na veiwatini e tiko na nodrau vale e volekata na baravi a qai vakadewataka yani vei turaganikoro ena gauna erau rogoca na rorogo ni kena sa sabica tiko na nodrau vale na kau. Erau qai raica na veika e sa yaco, e rau qai tukutuku totolo vua na turaganikoro.

Tukuni na kena i tukutuku ni karua ni ualoka e kaukauwa ka cere cake tale mai na dua na mita ka luvuca na rara ka curuma talega ka vakacacana e tolu na lomanivale e na loma ni koro.

Esa laki sikovi ira yani na ovisa kei na ivakalesilesi ni matanitu na Provincial Administrator ka ra sa vakasalataki me ra kua mada ni toki ena nodra koro me yacova na gauna esa laurai kina ni sa galala na nodra bula mai na vakacalaka kei na leqa tubu koso vakaoqo.

Na i matai ni ualoka e a yaco ena yabaki 2000, karua ena 2016 kei na kena i katolu ka yaco ena Siga Tabu.

More Stories