Ravuravu tiko o Keni

RATOU sa veivakasalataki tiko mai na Tabacakacaka ni Draki (Fiji Meteorological Service) mai Nadi, ni dua na cagi tataba e sa takosova tiko yani oqo na veimama kei Viti Levu, gole vaka kina yasayasa vaka-Ra, ka vakakina o Yasawa kei na yatu Mamanuca.

Sa vakasalataki tale tikoga na vo ni yasana e Viti Levu, Kadavu kei na vei yanuyanu lalai e Lomaiviti kei Lau e cake mo ni tu vakarau e na vuku ni cagilaba o Keni ni sa kumukumuni tiko mai ka na rawa ni curuma yani na veivanua sa volai no oqori e cake.

Sa nanumi tale tikoga ni o ni na vakila tiko na bula ni cagi na vo ni yasana o Viti Levu, Kadavu, Vanua Levu, Taveuni kei na veiyanuyanu lalai e Lau kei Lomaiviti.

E ratou vakadewataka mai na Tabana ni Draki, ni sa toso totolo sara tiko kina 13 na kilomita e na dua na auwa, ka sa vakasalataki tale ga ni na taubi tiko na uca e na vanua raraba o Viti.

Me yacova mai na 6 na kaloko e na mataka lailai ni Moniti, e laurai na cava o Keni ni sa tiko e na 760 na kilomita e na tokalau kei Nadi, ka 760 na kilomita e na vualiku kei Yasawa-I-Rara.

NI qai 1 na kaloko e na sigalevu ni Moniti sa laurai o TC Keni, ni sa ciciva tiko na 13 na kilomita, dua na auwa kei na tataba ni cagi kina 100 na kilomita, dua na auwa.

Na uto ni cagilaba o Keni e tiko e na 75 kilomita, dua na auwa kei na cagi tataba ki na 100 kilomita dua na auwa.

Sa nanumi tiko ni na rerevaki sara na cagilaba o Keni e na gauna e sa na tarai Viti Levu mai kina. E na i tosotoso e sa toso tiko kina na cagilaba o Keni e na gauna oqo e sa tiko e na 560 kilomita e na tokalau kei Nadi, rauta ni 530 na kilomita e na ceva kei Yasawa-I-Rara, ka nanumi tiko ni na tatara yani kina e na 6 na kaloko e na yakavi ni Moniti.

E na yakavi ni Moniti e nanumi tiko kina ni na lako siviti Vanua Levu na cagilaba o Keni ka tukuna kina na Talai Veivuke mai na Vualiku no Jovesa Vocea ni ra sa tekivu vakila tiko na lewe ni vanua na cagi tataba.

Sa vakasalataki ira na lewe ni vanua o Vocea me ra toso ki na vanua cecere e na vuku ni waluvu, ka vakavu mai na tau bi ni uca, ka sa vakarautaki tu na vanua ni drodro vei ira na ganiti ira.

E ra sa vakasalataki talega na lewe ni vanua me ra qirita na naba ni talevoni na 911, 919 se 917 kevaka era gadreva na veivuke e na gauna ni tiko leqa, ka ratou sa na wavoki tale tikoga na nona i vakalesilesi e na veivanua e nanumi tiko ni na tara yani na waluvu.

E kaya o Vocea ni ratou sa tekivu cakacaka e na veiya walu na auwa na nodratou timi tu vakawawa mai na Vualiku, tekivu mai na siga Vakarauwai.

?Sa tu vakarau na tabana ni leqa tubukoso e na Vualiku ke mani yacovi keimami mai na cagilaba o Keni e na e na dua na gauna lekaleka oqo,? tinia o Vocea

More Stories