Qito talega o Viti

Update: 11:05AM E tukuna ko Ratu Josaia Voreqe Bainimarama na gone turaga Paraiminisita ni kena mai okati talega na timi ni Viti me na vakaitavi ena sotasota ni rakavi mai Ositerelia ena yabaki mai qo 2017 ena sotasota ka vakatokai na �Australian 2017 National Rugby Championship� esa dua na kalawa levu vei Viti.

Ko Bainimarama, e peresitedi talega ni isoqosoqo ni rakavi unioni ena noda vanua (Fiji Rugby Union) ea tukuna na veika oqo ena nona a sainitaka na veidinadinati oqo mai Serene, Ositerelia ka na vakailavotaka na soqosoqo levu ni rakavi e vuravura (World Rugby).

E tukuna o Bainimarama ni oqo e dua na siga bibi vei Viti kei ira era dau veitokoni ena timi ni rakavi ni Viti.

E tomana na Gone Turaga Paraiminisita ni oqo e dua dina nai cavu kalawa levu ena rakavi e Viti ka kila ni na marautaka na veivakatorocaketaki qo na lewei Viti ka ni sa tadola na katuba vei ira na noda dauqito kei na noda vanua talega.

E vakavinavinakataka sara vakalevu o Bainimarama na isoqosoqo ni rakavi e vuravura ena nona vakailavotaka na porokaramu qo me rawa ni vakaitavi o Viti.

Na timi ni Viti esa na i ka 9 ni timi me na qito tiko ena sotasota qo ka na tekivutaki tiko ena Okosita ni 2017.

Esa na qito tiko o Viti vaka va mai Ositerelia kei na va na qito ena mai qitora tiko e na noda vanua.

Na sotasota vakayasana e Viti esa na vakacavari tiko e na Jiulai ka sa na tekivutaki tiko na sotasota ni NRC ena Okosita.

E nuitaka talega na Paraiminisita ni ra sa na vakanamata na cauravou dauqito ena noda vanua me ra na vakaitavi ena sotasota qo ena i matai ni gauna.

E tomana ni nona sa na rawa ni mai vakaitavi qo o Viti e vakabauta ni na dolava e dua na gaunisala vei ira na noda dauqito, dauniveivakatavulici kei ira na i vakalesilesi, ka vakabibi vei ira na noda dauqito me ra na qito ena i vakatagedegede e cake ena vei sotasota tale eso.

E kaya na Paraiminisita ni oqo e dua na cavu i kalawa ni noda matanitu ena vuku ni tarai cake ni rakavi kei na qito e Viti, ena Jiulai ea qarava o Viti nai matai ni qito ni Super Rugby ka vakayacori ena ANZ Stadium e Suva.

Ena yabaki qo ea qarava talega o Viti na kena mai vakayacori na sotasota ni Oceania Volleyball, Oceania Swimming kei na Oceania Weightlifting.

Ia, ena macawa sa oti e a qaravi kina na sotasota ni Fiji International Golf tournament ka vakayacori e Natadola Bay, ka ra mai vakaitavi kina eso na yaca rogo ena buturara ni qito golf mai na veiyasai vuravura.

Me vaka sa i katolu ni yabaki qo esa tiki tiko ni �European Tour� na sotasota ni golf qo e Viti.

E tukuna ko Bainimarama ni sa toqai koya oti tiko o Viti ena mape kei vuravura ni vanua dauqito.

Me vaka ni kila tu o vuravura ena Okosita, e ratou a lave rara mai Rio na noda cauravou ena kena rawati mai na koula ena sotasota ni rakavi lewe ya vitu ena qito ni Olympics.

E dua na gauna talei e Viti ka na guiguilecavi dredre.

E vakadeitaka na Turaga Paraiminisita vei kemuni na dauqito rakavi kei kemuni na dau tokona na rakavi e Viti kei Ositerelia, ni ratou na solia taucoko na yalodratou na noda dauqito ka ratou na qito me rawa na qaqa.

More Stories