Oso sivia

Update: 9:28AM SA osodrogi sara tu ga na noda valeniveivesu, vakauasivi vei ira era waraka tu na nodra kisi ni veilewai (remand centres) e na gauna oqo. E vakadeitaka mai na gusunivosa ni valeniveivesu o Kuini Waqasavou ni gauna oqo e sa sivia na 163 na kaivesu era sa vesu tiko ena loma ni 13 na valeniveivesu kece ena noda vanua.

�Na gauna oqo na i wiliwili ni kaivesu e tiko ena 1,571, qo e wili kina o ira era waraka na nodra veilewai kei ira era sa soli oti na nodra i totogi,� e kaya mai o Waqasavou ena siga Tusiti ni macawa oqo.

Oqo e dua na leqa levu ka vuna na nona sa mai vakatututaka kina o Nai Talatala ni Valeniveivesu mai na lotu Wesele, o Talatala Josefa Tikonatabua ni na daumaka me na kau lesu mai na Mataveilewai Vakaitaukei, me rawa ni veivuke vei iratou na tabana ni lawa .

E raica tiko o Talatala Tikonatabua ni vaka me sa gole tikoga vakadua ki valeniveivesu o ira kece era basuka na lawa ni noda matanitu.

�Ena daumaka ke rawa ni wali ga mai ena veikoro se mai na loma ni yasana na basu lawa e dau yaco ena noda veikoro.

�Au nanuma ni oqo ena veivuke ena kena vakalailaitaki na i wiliwili ni lewenivanua era sa curu tiko oqo ena noda valenivesu.

�Baleta ni laurai tiko ni sa dua vata ga na katuba e sa laki wali tiko kina na cala, ka sa oso sara tiko na valeniveivesu kei ira era tiko wawa ena nodra waraka tiko na macala ni nodra veilewai.

�E na gadrevi me na dau vesu ga o ira era cala bibi me vaka na kucu se na laba.

�Eso na cala ena noda veikoro ke sa rawa ni walia ga o turaganikoro se na valenivolavola ni Roko, esa na veivuke sara oya,� e kaya o Talatala Tikonatabua.

E na i tukutuku vakarautaki ni Dodonu ni Tamata Yadua ena 2013, ka tabaki ena yabaki sa oti mai vei ratou na United States Department of State, e biu tiko kina ni 1,361 na levu kece ni lewenivanua era rawa ni vakatikori ena loma ni 12 na valeniveivesu ena veiyasai Viti.

E ko Apakuki Kurusiga, na i vakailesilesi liu ni Tabacakacaka i Taukei, ni gauna oqo e se bera ni ratou veitalanoataka e dua na ka me baleta na kena kau lesu tale mai na Mataveilewai Vakaitaukei.

�Ena gauna mada ga oqo, e se bera ni keitou veivosakitaka e dua na ka me baleta na mataveilewai i taukei.

�Na lawa talega ni koro, e na qai biu mai me sa dua na lawa ena gauna esa butuki oti kina na i yalayala ni koro, oya ena yabaki ka tu mai,� e kaya.

More Stories