Ono na koula e rawati ena lade

A mai qaqa na Natabua High School vei ira na gonetagane ena sotasota ni 2017 Coca-Cola ena ANZ stadium ena mua ni macawa sa oti.

E ratou rawata e 12 na koula, lima na siliva kei na lima na varasa, ia o Marist Brothers High School e mai karua ena 10 na koula, 8 na siliva kei na 7 na varasa, ka mai katolu o Ratu Kadavulevu School ena 10 na koula, 7 na siliva kei na 5 na varasa.

Ia, mai na 12 na metali koula e rawata o Natabua, e 6 na koula e rawa mai na rara ni lade, viritaki ka bi, coka kei na lade balavu, ka ni oqo na nodratu tarabu me vaka e vakaraitaka ko John Iroa na dauniveivakatavulici.

A tuberi Natabua voli mai o Iroa ena loma ni vitu na yabaki ka vakabauta ni sa qai mai yaco dina na nona tatadra ena veika e ratou rawata na cauravou ni Natabua.

E kaya ni ratou a mai druka ena rua na lade nuitaki, ia e dua na ka vinaka ni ratou qaqa ena ono tale na lade.

E kuria o Iroa ena yabaki 2015 ena nona qaqa o Natabua vei ira na gonetagane, e ratou rawata kece na qaqa ena lade.

E vakavinavinakataka o Iroa na vuli ka mai vakarautaka na Oceania Sports Education Programme (OSEP) ka veituberi kina o Talemo Waqa ka tiki talega ni nona rawa ni qaqa o Natabua.

E tukuna o Iroa ena porokaramu ni OSEP e vakavuna me rawa ni ratou biuta vata kina na porokaramu ni vakaukauwa yago vei ira na dauqito ka vakavinavinakataki Talemo Waqa kina kei iratou na timi ni OSEP.

Ia, vei ira na goneyalewa e mai liu o Adi Cakobau ena 20 na koula, 14 na siliva kei na 10 na varasa. Mai karua o Jasper Williams high School ena 11 na koula, 10 na siliva kei na 8 na varasa ka mai katolu na koronivuli o Saint Joseph?s Secondary School ena 4 na koula, 5 na siliva kei na 8 na varasa.

More Stories