Nodra dodonu ni digidigi na i tubutubu: Leawere

Update: 10:56AM

ESA kacivaka oti na Minisita ni Vuli, o Doketa Mahendra Reddy ni sa na vakaukauwataki na lalawa ni minisitiri ena vuku ni nodra vuli voleka na gonevuli ena nodra i tikotiko. 

E vakadeitaka na i tukutuku oqo ena dua na nona laki vosa vei ira na manidia ni koronivuli e Labasa College mai Vanua Levu ena rua na macawa sa oti.

Ia, e kaya o Mika Leawere, ka lewe ni Palimedi mai na i To ni Veisaqa ni tiko na dodonu ni digidigi vei ira na i tubutubu me ra na lewa na vanua e vuli kina na luvedra.

E kaya o Leawere ni tiko talega ena ruku ni lawa ni vuli, na kena soli na galala vei ira na i tubutubu ena vuku ni koronivuli era na via vuli kina na gonevuli ena yabaki vou.

E tukuna o Leawere ni sega ni ka rawarawa na vakayacora na lawa oqo, baleta ni ra lewa na i tubutubu na koronivuli cava era gadreva me na laki vuli kina na luvedra ena paraimiri kei na sekeniri.

Na matanitu veiliutaki a tekivutaka ena yabaki tolu sa oti na kena sa sega ni saumi na i curucuru ni vuli nodra na luveda mai na Kalasi Dua me yaco vei ira na Fomu Vitu.

E na yabaki talega oqo e sa sega talega ni saumi na nodra i curucuru ni vuli na luveda era muri vuli tiko.

Mai tekivutaka talega na matanitu na veivuke vakailavo ni kena saumi na nodra i curucuru ni vuli na luveda ena vuli toro cake me vaka na vuli ena univesiti kei na so tale na tabana ni vuli toro cake e Viti, ka yacana na Student Loan Scheme.

E tiko talega na sikolosivi e solia na matanitu me vaka na Toppers.

E namaki me na vakaukauwataki na lalawa ni nodra vuli voleka na luveda ena tekivu ni yabaki vakavuli ena yabaki mai oqo.

More Stories