NAI VOLA VUA NA EDITA

Update: 10:46AM Toki na koro
ENA yabaki 1964 e a tarai Viti kina e dua na cagilaba kei na waluvu vakadomobula, ka ra luvu kina na veivale, na koro, na tauni ko Sigatoka, Navua, Nausori, Ba, Nadi, ka ra bau tokitaki na bucabuca ko Rewa ki na Baker Hall mai Davuilevu.

E a kamusu talega kina na wavu e Sigatoka ni ra sa tao kina na vunibitu, kei na vunikau lelevu ka ra kuitaki sobu mai e na uciwai na Sigatoka.

Ia, na koro ko Koronisagana e sega ni kune na doka ni nodra veivale vaka- Viti.

E a luvu talega o Nasova na vale ni vanua e na yavusa No i Nabua, ka ra cerebu e na veivava na lewe ni koro kei na i yaya ni vale cava ga era kauta rawa.

Na ka ga e vinaka kina na bogi ni waluvu baleta ni siga ni liwa na cagilaba, ia, era vakatautau uca tu ga me yacova na kida ni mataka.

Ni oti na waluvu vakadomobula oya, sa mani lewa na turaga Roko Tui Nadroga/Navosa, me sa tokitaki na koro ki tai ni wai e na yasa ni koronivuli ko Naqalimare.

Oti oya sa mani mai cumuta yani me vakatautauvatataka na delana oya na katavila (bulldozer) me rawa ni toki mai kina na koro ko Koronisagana.

Sa mai tara vou talega kina na vale o Nasova e na yavusa o No i Nabua e na koro vou e Koronisagana. Sa biu koto mai na koro makawa na yavu cere duadua ni vale o Nasova.

Era dau kaya na qase e na vei korokoro e na loma ni yavusa o Nabuavatu me tekivu mai Mavua ka yaco mai Naqalimare, ni ra dui colata mai na turaga yadua na nodra dui i su qele ka mai buli cake kina na yavu ni vale o Nasova e Koronisagana makawa.

E kena i balebale oya na nodra yalovata kei na nodra duavata me ra sa vakaliuca na na yavusa No i Nabua me sa nodra vale ni vanua o Nasova. Era sa vakadeitaka kina ni sa dua ga na nodra turaga, dua ga na nodra vale levu ni vanua, ka dua talega na nodra yavusa oya o No i Nabua.

JOVECI GIVAKI

Toga, Naqalimare, Nadroga

Wai kei na cagi

SA mai tavoci oti na lotu Hindu e na yasana ko Kadavu, ka yaco kina na lolo kei na masumasu me vaka na i valavala ni lotu, oti qai caka e dua na kena yaqona ka vagolei tani kina na cagi e rua, na Winston kei Zina e na yasana ko Kadavu.

E dau gunuvi na kena bilo yaqona, era vosota na Hindu me ra bula ga na lewe ni yasana ko Kadavu.

Sa baci vakayacori tale na lolo kei na masu ka gunuvi tale na kena bilo yaqona, ka kerei vua na Kalou me vakadrodroya mai na wai me ra bula o ira e so na i wase ni tamata vakabauta, baleta ni sa mai duavata kecega na yacada na Fijian.

Keimami vakabauta na lotu Hindu ni solia mai na Kalou na kaukauwa me gole laivi na cagi e na yasana o Kadavu ka vakavurea mai na wai ni bula e na vanua o Tailevu e na koro ko Natadradave.

E caka tiko na kena lolo kei na masumasu ka gunuvi tale tikoga na kena bilo yaqona e na yasana ko Kadavu na i sevu ni kena tavoci kina na lotu Hindu.

Na wai ka tovure tiko mai Natadradave e wai ni bula ka solia mai na Kalou me baleti Viti e na kena sa qai donu tiko mai vakamalua na veiliutaki, ka sa qai vovoleka mai na gauna vinaka vei keda kece na lewe ni vanua e Viti.

E vuqa era kaya tiko ni wai kei na kena vagolei na cagilaba ka keimami cakava na lotu Hindu, ka rogo tiko mai kina na vosa oqo; me tarogi mada o Kadavu.

E na daku ni vosa oqori, e kilai vinaka tiko na kena i balebale me tarogi o Kadavu se kaukauwa i cei ka caka tiko mai kina na mana oqo. Au kerea me?u na qai kuria tale yani vakamalua.

EPELI VUNIRARAMA

Natumua, Tavuki, Kadavu

Cava na siga

bera na liga

Keitou sa kere veivosoti tiko yani na i Taukei ni vale o Nasova vei kemudou na turaga ni vanua o Naroyasi e na koro o Nasivikoso, e na vuku ni bera ni neitou vakarautaka na i yaya kauvaro ni vale.

Keitou sa kurabuitaka sara ga ni tini wale ga na siga na nomuni mai tara kina na vale ni vanua o Nasova ka sa mai oti toka.

E na vuku ni neitou bera, keitou sa na qai vakabeletitaka tiko na lalaga ni vale, na katuba levu, na katuba leka.

Ni sa mai oti na siga yalataki, sa ka levu sara na neimami vakavinavinaka vei kemudou yadudua sara, e na kena biu tu mai na matavuvale ka dou mai soli bula e na dela tiko ga ni nomudou vanua e Nabuavatu. Oqo na i tukutuku tawa mudu ni veigauna e Nabuavatu ni sirova mai o Naroyasi.

Vinaka vakalevu

JOVECI GIVAKI

Toga, Naqalimari, Nadroga

Isireli: Na dina, dodonu kei na

savasava

Au dau wilika ka dau vakamuria tiko mai na i talanoa e dau nona rai tiko o na wekaqu Lekima Lawenitoakula me baleta na nona a la?ki yabaki ciwa tu mai Isireli ka bula vata kei ira na Rapai.

E sega ni rawa me mai bulia e dua na i vunau vou.

Na i vunau kei na vei tiki ni Vola Tabu ga e sa tu makawa.

Au via taroga tikoga na wekaqu o Lawenitoakula, se siga cava e ra dau rokova na Isireli me nodra Siga Tabu?

O ira na i Kavitu era vaka Siga Tabu tiko e na siga Vakarauwai.

Mai Isireli na siga cava era dau vakacegu mai na nodra cakacaka?

Me da kila rawa mada e liu qori, me qai muri na noda via vakamacala e na i Vola Tabu.

Me vaka ni a bulia na Kalou na i kavitu ni siga me nona siga ni vakacecegu.

EPELI VUNIRARAMA

Natumua, Tavuki, Kadavu

No i Nabua

kei Nabuavatu

E rua tiko na yaca duidui e cavuti tiko kina na neitou yavusa.

Matai ni yaca o No i Nabua.

Na gauna keitou dau la?ki veitalanoa kina ki na vale ni Tabacakacaka i Taukei, keitou dau rogoca ni sa dau wiliki mai vakaivola na i tukutuku, ka kena i vakaraitaki me vaka oqo:

?Na yavusa o No i Nabua e dua ga na kena vale ni vanua oya o Nasova?.

Oya e sa toqai sara tu ga mai vakaivola.

Keimami vakabauta ni oya na yaca era tukuna na neimami i tubutubu ki na vale ni Tabacakacaka i Taukei.

Na i karua ni yaca o Nabuavatu.

Oqo na yaca e keitou vakayagataka e veisiga me cavuti raraba ni yavusa.

E sa kilai raraba tu na yaca o Nabuavatu me yacova mai ni kua.

Sa dodonu ga me dau cavuti o Nabuavatu, me baleta na vale ni vanua o Nasova e Naqalimare.

Vinaka vakalevu

JOVECI GIVAKI

Toga, Naqalimare, Nadroga

Na Veivakavoui

E a papitaisotaki au na Yalotabu e na dela ni davodavo ni dua na tauvimate levu.

Au a vakila e na yagoqu, yaloqu taucoko kei na lomaqu ni sa na rawati au ko mate.

Au a sa suka mai valenibula ni sa lai kerea mai na watiqu me?u sa suka ki vale.

Na mosi ni suitu ni dakuqu era sega ni kila rawa na vuniwai me ra vukei au vakacava.

E ra veisau ga na vuniwai, me ra vukei au , na vuniwai lelevu, ia era sega ni kunea rawa e dua na tauvimate me ra rawa ni kila na ka mera cakava.

E na veiyarua na auwa, era a culai au tikoga e na penicillin ni ra gadreva meu vukei e na noqu mosi.

Ia, na mosi sa qai levu cake ga. Na ka ga sa qai cakava ki yagoqu na wainimate oqori, sa qai vakavuna me vuvuce mai na yagoqu taucoko.

Qo me vaka me sa dau vuvuce mai na yagodra e ra sa dau voleka ni mate.

Na bi ni yagoqu e dredre meu yavala.

Au sega mada ga ni? davo rawa, au duri tikoga e na siga kei na bogi ka vesuka tiko na liga ni dabedabe au a duri tiko kina.

E dua na yavala lailai e a vakatubura mai na mosi e na kena kaukauwa taucoko.

Ni toso na veisiga, sa tu ga vei au na vakasama ni mate.

E dua na sasaga dredre vei au niu sa mai kau ki neitou.

Au sasaga meu biuta na wheelchair mai valenibula.

Au sasaga meu siro mai na lori meu yaco yani ki na noqu i davodavo niu sa yaco ki vale.

E dredre meu laveti ni mosi vei au me ra tarai au.

E ra a laivi au ga meu dau sagai au, ka tu vakarau me veivuke keu gadreva me vakakina.

E a tiko raviti au voli ga na marama tinaqu ka keirau vakila ruarua ni sa voleka na veitalatala. Au a nanuma tu meu na tatau vei koya ena i otioti ni vica na miniti ni noqu bula baleti rau na luvequ lalai.

Ia, na veika kece oqori e a qai veisautaka na Turaga.

E a mai kacivi tani ko tinaqu me laki vakayakavi.

Na i vesu bibi ni mate e oloni au tu e na gauna au vakila kina ni tukuni mai yaloqu

? Masu?. Au sasaga vakaukauwa ki nai davodavo e ra ka tovolea meu tekiduru.

Au a tekivu e na vakatutusa kei na kere loloma vua sa nona na lewa mai bulu, e vuravura kei wasawasa maliwa lala kei lomalagi talega. Ni?u sa masu tiko au qai vakila ni tarai au e dua na livaliva e kauta mai na bula.

E drodrova na yaloqu, na yaqoqu na lomaqu kau qai vakila vaka e dua na i sele gata e a seleta rua na lomaserequ.

Mai loma, au a rogoca na domo ni vosa mai vei au e na dua nai yatuvosa.

E kaya mai vaqo ?Iko na bula?.

E rogo matata, kau vakila ni lako vata mai kei na dua na lewa

authority kei na kaukauwa, sa segai tu ga ni rawa ni dua me saqata.

E a qai laki tini ga na noqu masu niu sa sinai vuabale ena reki kei na vakavinavinaka ka vaka me tovure tu mai yaloqu me vaka e dua na mataniwai savasava.

E a vaka au nawa tu e maliwa lala ka vuabale dina na yaloqu.

E a tadola vinaka tu ga na yaloqu kau vakila ni?u sema sara tiko ga oqori ki na i tikotiko vakaturaga vei Jisu.

E a tarava mai oqori na kena tukuni mai lomaqu se yaloqu na qaqa ni sere taucoko naba 101 e na i vola ni sere levu ni Lotu Wesele. ?Yalo Tabu Vu ni dina?, curu ki lomaqu ga.

Ni tadodo vinaka tiko noqu rogoca ka ciqoma e yaloqu na qaqana yadua, e a qai dua nai yatuvosa e laveti cake mai vei ira na kena vo ni qaqa ni sere.

E stand out mai na qaqana e kaya vakaoqo ?Kauta mai na i tukutuku, Sa Loloma na Kalou?.

Veiwekani, Yalo Tabu e kau i tukutuku mai lomalagi ki vuravura ena dela ni nodatou gauna.

Qo nai tukutuku ni loloma.

Sa tu oqo na cudru waqawaqa.

Na loloma ni Kalou e mai tuberi keda ena i otioti ni gauna ena ka meda cakava meda bula kina.

Sa yaco mai nona matanitu, saumaki mai me da gone lailai taucoko na tamata meda rawa ni curu kina.

Sa na vakayacora ga ko Jiova na lomana.

Au wasea tiko eke nai tukutuku ni Yalo Tabu, e sega ni noqu.

Au curuma mai na kena buca ni vakararawataki, e na kena madua, veiulunivanua ni vakacacani, beci, biliraki, mokulaki.

Na vakuwai se Sacrifice eda guilecavi keda kina ka rerevaki koya ga e gadreva me yaco ena noda bula na lomana.

Ni sa kena gauna. Wekaqu lomani na veiyalayalati e kauta mai o Jisu e kaya kina o koya.  ?Raica au sa lako mai meu cakava na ka ko sa vinakata, na Kalou.?

Oqo ga na lotu vakayalo ka vakaidina. Sorovaka vakaoti vua nomu bula me cakava o koya na lomana ena vuku ni nomu bula. Sa rauta na vakacudruya na Kalou e na lotu vakayago.

LOATA VANA

Nakorovou, Dreketi,

Rewa.

Veitarogivanua

ENA Veitarogivanua ni yabaki 1912 ka a vakayacori mai Mavua, sa rogolevu sara mai kina ni sa tawana tiko na vale o Nasova, na turaga ni yavusa e Nabuavatu o Ratu Veceli Derederenalagi tikoga oqo, a vakavuna me ra solia mai na mataqali o Tauyasa, e Toga na qele o Vakavu kei Nakobitu me ra sa teitei kina na mataqali Savai, baleta ni ra sa mai maroroi ka vakarurugi tiko e Nasova.

E ra sa na sega ni suka tale ki na nodra vanua o Kainiyasawa e na vale ni vanua o Erenalaya.

A sosomitaki Ratu Veceli Derederenalagi na turaga ni yavusa e No i Nabua o Nemani Degei (naba dua) mai Koronisagana makawa ni bera ni tokitaki mai tai ka sa tiko kina e na gauna e daidai.

Ni mai leqa o Nemani Degei na turaga ni yavusa o Nabuavatu (No i Nabua) sa mai sosomitaki koya me turaga ni yavusa e Nabuavatu o Ratu Jalesi Vuki Derederenalagi.

Sa rusa talega kina na i matai ni vale vaka-Viti o Nasova e na nona gauna o Ratu Jalesi, ka taura tale tikoga na i tutu ni manidia ni koronivuli ni tikina o Naqalimare me yacova na nona vakacegu.

Ia, e na yabaki 2006 sa mai taura kina na i tutu ni turaga ni yavusa e No i Nabua o Nemani Degei (naba rua) ka sa qai tara tale kina na vale o Nasova e na gauna e sa mai rusa kina na vale e liu.

E na vula oqo e ra sa qai mai vakaduria tale na vale ni yavusa o No i Nabua na koro ko Nasovikoso e Naroyasi, Bukua e na yasana o Ba.

Vinaka vakalevu Naroyasi e na nomuni mai tara tale na vale o Nasova me i divi tu kina na yavusa o Nabuavatu (No i Nabua), ka sa mai rawa kina na veilomani kei na duavata ni vanua.

Vinaka vakalevu.

JOVECI GIVAKI

Toga, Naqalimare, Nadroga

Na Yaca

AU via vakanaumi keda lesu tale na dau vakamuria na Nai Lalakai ena veimacawa ena vuku ni ulutaga e toka qo e cake. Sa mai cava toka ena vica na macawa sa oti ena kena vakadodonutaki ga e so nai tukutuku sa rogovaki tiko qo ena noda vanua ni dua na vakabauta vou era sega ni vakabauta na yaca a Jesus se ko Jisu.

Se na uto ni tukutuku ena macawa sa oti sai koya ni cala na yaca na Jesus/ Jisu e vakayagataki tiko qo kei na kena cudru e muri keda voli.

O koya e volavola tiko yani qo, e dua e sa mai biuta se sa sega ni vakayagataka na yaca na Jisu baleta e sega ni yaca ni kalou dina. E dua na yaca e da mai lasutaki tiko kina. Ena wase ni talanoa ka tarava au na qai vakamacalataka na kena tekivu se bucini mai na yaca qo na Jesus/ Jisu kei na Yaca ni Kalou Dina ka toqai no e nai Vola Tabu, kei na kena vakaraitaki ena loma ni matavuvale na kena rai. Ka vakabibi ni dina qo e sega ni ka vou me vaka era nanuma na wekada eso, e dua na DINA e sagai me vunitaki se tababokoci vakadua na Yaca ni Kalou dina. Ia, kena seva na �dina ena dina tikoga, ena veisereki ga na ka dina�

So era na vosa ka tukuna sa baci dua tale na dina e basika cake mai qo. So era kaya ni dua na vakabauta vou sa baci basika mai qo, so era na coqa, so e vakatataro, ka so na wekada era marautaka na kena sa wasei vakadodonu vei ira nai tukutuku sa rogo tu qo ena noda vanua ka ra vakadinadinataka ni sai koya qo nai tukutuku e waraka tiko o Viti.

Au na via kauti keda vakalailai ga ki muri ena dua na nonai vola o Metuisela e dua na wekada ka dau volavola talega enai Nai Lalakai. Au na vakaraitaka ga e rua na nona rai ka sa wasea oti vei keda. Kenai matai ena yabaki 2001 e vakaraitaki vua ena rai ni na lesu tale mai o Rabuka. Tukuna o koya ni levu era vosa, ia na Kalou sa vakaraitaka oti vua.

Ia ena yabaki qo sa curuma yani o Rabuka na kena katuba. Kenai karua ena 2010 e vakaraitaki vua ena rai ni vakasaqarai tiko e dua me soli vua na veiliutaki ni noda vanua o Viti. Raica o koya ni qai tavali e matana e dua na goneyalewa lailai i Taukei.

Qai rogo mai e dua na domo, �solia vua na goneyalewa lailai qori na veiliutaki me liutaki Viti�.

Tukuna o koya na goneyalewa ni Viti oya e dusia tiko na lotu. Ena dua ga na lotu ena tauyavu ga i Viti ka na lotu kece kina na lewei Viti.

Qai tukuna o koya ni lewe levu era vosa se cava e sa mai biligi tani kina vakatikitiki na lotu eda sa lewena tu mai vakabalavu.

Qai tukuna o koya ni oya sara ga na vedigitaki ni Kalou.

Ia ena yabaki 2011 sa basika na raivotu qo.

Ia au sa na tekivu wasea tiko yani vakamalua vei keda na dina qo me rawa ni da kila na vanua e vu mai kina na yaca ni kalou lasutaki qo o Jesus/Jisu, baleta qo nai otioti ni tukutuku e dodonu me kila na tamata ka vakabibi ni sai koya sara ga qo nai tukutuku enai otitoi ni gauna qo.

Au vakabauta ni so vei kemuni esa na lomatarotaro baleta na balavu ni gauna e lotu tu mai kina, E sa dua tu ga nai vakarau ni bula. Nai sau ni vakatataro levu duaduaga sai koya ni sega ni masuti se qaravi tiko na Kalou Dina kei na Yacana Dina kei na kena vakamuri nai Vunau E Tini me dabe ka yavutaki kina na noda vakabauta. Ia eda vakavinavinaka vua na Kalou ni rawa ni takoso se yaco ga na nona lewa me sa vakaraitaki kina na ka dina ena noda vanua.

Tiki ni Vola Tabu qo e yacovi keda sara tikoga na kai Viti ena gauna oqo ka sega ni dua e rawa ni vakalasua nai tukutuku qo.

Ni saravi na nodra bula na kai tani vata kei keda, eda sarava na duidui levu ena veitaba ni bula kece. O ira na vulagi era se sotava ga mai na dredre o ira na tubudra ena gauna era mai tauyavu kina.

O ira na luvedra kei na nodra kawa ena veitabagauna mai muri qo, era sa mai tamusuka ga na vua ni nodra oca kei na buno ni tubudra vakavica.

Ia ni saravi na noda bula o keda e laurai ni muri kawa sobu tiko ga mai na dredre.

Se dauteitei tu ga mai o tubuda vakavica ena veigauna sa oti ka mai yacovi kedatou nai tabatamata eda bula tiko ena gauna oqo. Ia eda tukuna ni da qarava tiko e dua na Kalou dina na Yacana o Jesus/Jisu…

O ira na kai tani eda tukuna ni ra qarava na Kalou matakau… Ia na veibasai kece ni ka, e yacovi keda tiko na vakatusa ni Kalou dina o Jesus/Jisu.

44. �Ena solia vei kemuni ko koya me talevaki, ka ko ni na sega ni solia vua me talevaki. Ena ULUMUNI KO KOYA, ia KOI KEMUNI KO NI NA BUINA.� Qo na bula e tiko ki na kai Viti ena gauna nikua ka sega ni rawa ni da na cakitaka rawa.

Au vakaraitaka toka ena noqu i vola ena vica na macawa sa oti eda nai murimuri tu ga ni veika kece.

45. �Ia na ca kecega oqo ena yacovi kemuni, ka muri kemuni, ka vauci kemuni, ka mo ni vakarusai mada, ni kemuni a sega ni vakarorogo ki na vosa i (…….) na nomuni Kalou, mo ni vakabauta na nonai vakaro kei na nonai lesilesi sa vakarota vei kemuni ko koya.� 46.�Ia era na tiko vei kemuni mei vakatakilakila, kei na ka ni veivakidacalataki, vei ira talega na nomuni kawa ka tawa mudu.� Vakaraitaki toka e na tiko ni Vola Tabu qori ni na yacovi keda na ca. Ena yaco tiko mei vakatakilakila vei keda kei ira na noda kawa ka tawa mudu.

Au vakaraitaka toka ena macawa sa oti ni yaco tiko vei keda na cudru ni Kalou baleta ni sa mai biu na Yaca ni Kalou Dina, ka sa mai qaravi tu e dua e sega ni kalou na yacana o Jesus/Jisu. Sa mai vakamamadataki ka guilecavi vakadua na Vunau ni Kalou sai koya nai �Vunau E Tini,� ka sa veisosomitaki mai na veiyavu ni veisoqosoqo lotu era bulia ga na tamata. Vosa kina nai Vola Tabu ena Marika 7-8, Ni dou sa biuta tani na Vunau ni Kalou ka vakabauta nai vakavuvuli vakatamata.

Ena i Vola Tabu , Dauveilewai 2-11, E tukuni toka kina ni sa mai biu na Kalou ni nodra qase…era sa muria e so na vei Kalou tani,

Era vakacudruya na Kalou ka qaravi Peali (Lord). Ni o vakamuria lesu tale na nona dau serelaka tiko vei keda o Tabua na Lawata ni gauna enai ulutaga �Mai Drevekai ki Nakauvadra� e dua na qaqa ni lawata sei tukutuku e va toka qo �O ira na Noda Qase era Iperiu ka ra masuta na yaca ni Kalou dina era sa mai vakatanitaka na yago vulavula se ko ira na kai valagi ka ra vakadewataka ena yaca vakavalagi�.

Ka vaka kina ena nodra sa mai veisautaka nai vakarau ni nona qaravi na Kalou levu qo na dauveibuli, e kaya o Tabua.

Na Yaca ni Kalou Dina qo ena sereki Viti, ka vakakina o vuravura ena ciciva mai me vaka e sa parofisaitaki oti tu mai.

Ena yabaki sa oti 2015 ena nona i tukutuku e dua na bete mai Switzerland e tukuna kina �Ni na cadra mai na Pasivika e dua na rarama ena raica kece yani o vuravura�. E vakamuria sara mai na turaga qo na veika e raica ka gole sara mai Viti me mai raica se mataqali tamata vakacava e ra bula tu qo i Viti…

Meu kaya vei keda nikua na rarama oya sai koya na �Yaca ni Kalou Dina sa tekivu laurai ka cila cake ena noda Vitia�. E mai vakatusa talega na turaga qo ena dua na veivosaki e vakayacori ni tukuna o koya, �Nikua au laveta na ligaqu meu vakatusa ni o keitou na lotu Katolika keitou veisautaka na Yaca ni Kalou Dina kei na kena veisautaki talega na Siga Tabu mai na Vakarauwai (Sabbath) kina matai ni siga ni wiki.�

Na kena basika mai na dina qo kei na yaca ni Kalou dina qo i Viti, sa via dusia tiko e dua nai tukutuku vei keda ni sa vakarau cabe tale ga mai nai katolu se nai otioti ni �D� ka kena ulutaga na �Tolu na D Vakaturaga� me vaka e serelaka toka na wekaqu mai na koro o Naocobau ena tikina o Nakorotubu ena yasana o Ra sai koya na gauna ni �DECALOGUE�, kenai balebale na Ten Commandments, se na Vunau E Tini.

Na Decalogue / Vunau E Tini na yavu ena maroroya na Yaca ni Kalou Dina sa basika qo i Viti. Au na serelaka tiko yani na kena i vakamacala vei keda ena veimacawa, Keda vinakata se sega, ni sa cabe mai na gauna qo ena sega ni dua na tamata, se dua na ka ena tarova rawa nai tuvatuva kei na lewa ni Kalou i Vitia.

TAITUSI LIU

NADI.

Na i sele kei na polo

EDA sa rawata mai na metali koula mai Rio oya na qitotaki ni polo.

Sa levu sara na veiqito lelevu sa cavuisausau kina na noda vanua lomani ko Viti ena veimataqali qito kece sara.

Ena buca ni vala eda vakairogorogo kina mai Solomoni, Malaya, Tokalauiloma kei na vuqa tale.

Sa rogo yawa sara na noda vanua ena veiyasai vuravura.

Ena veika vakavuli na veikoroi era sa rawata na noda gone.

Sa tiko ena dua na kena iveta i cake.

Ena veivaka vakalotu era qalo wasa yani na i talai ena kena vakadewataki yani na rarama ni Vosa ni Kalou ena veiyasai vuravira.

Eda kata liga, eda sa cibi ka qoroqoro ena veika eda sa rawata.

Na veika au raica rawa ni da sa rui malumalumu ena noda vakayagataka na noda qele na kena samaki na veikau bula me teivaki,

Eda sa vaqitora vakalevu na polo ka sa lailai na gauna na kena vakayagataki na i sele me samaki yani kina na qele me teivaki.

Eda gole yani ki vanua tani ena qito, na cakacaka kei na vuqa tale.

Era gole mai vanua tani e Viti me ra mai cakacakataka na noda qele era rawata na milioni.

Na bula e tu ga ena noda vanua. Au kerea me sa veisau na noda rai meda sa dabeca sara ga na noda veitikini qele me da teivaka ena gauna sara ga oqo.

Sa kua na wele, me da sa yadra mai ena gauna oqo.

Vakadeitaki iko, tu vakatagane.

Qarava na nomu qele mo na bula kina kei ira na nomu kawa me sa kua na vakalusi gauna ena veitalanoa sega ni dua na betena. Vakalusi gauna.

Sega ni dua na ka ena kauta mai.

Kauta ga mai na dravudravua kei na dravuisiga ni bula.

Na qito rakavi e rawa ga ni ra rawata ga eso.

Ia, ni da vakayagataki qele, eda na �Fiji rep �taucoko.

Me sa yadra mai na i taukei ena gauna oqo.

Au kerei iko mo vakadewataka yani vei ira na wekamu me ra dabeca na nodra veitiki ni qele me ra cakacakataka.

Sega ni vula mai qo se yabaki mai oqo e da laki dabeca kina na kemu qele mo vakatoroicaketaka.

O na rawata mai kina na milioni.

Lako ena cakacaka kei na vakabauta o na qai tauca na vua ni vosota.

Noda leqa tiko na i taukei na vakayagataki ni gauna, cakacakataka na gauna, kakua ni volitaka.

Au kerei keda na i taukei kai Viti me da sa yadra mai ena gauna oqo na noda veitikini qele e lala tu me vakatawani mai.

Kevaka o sa solia na nomu qele vua e dua na vulagi osa solia tiko na nomu milioni vua na vulagi.

Dabeca na nomu qele, vakatawa ka cakacakataka.

Yadrava.

Ena gauna oqo me da sa vakayagataka vakalevu na i sele me samaki yani kina na veiyasana e 14 ni noda vanua me teivaki.

Na i lavo e tiko ga e Viti.

O iko ga o sega ni cakacakataka.

Sa da laki vaqara cakacaka ki Ositerelia kei Niusiladi, na i lavo e tu ga oqo e Viti.

Na veika ga me vakayacora na matanitu me solia vei ira na i taukei na �capital� me tekivu kina na nodra vakatoroicaketaka na nodra qele. E dua na i uma ilavo me na solia na matanitu me ra vukei kina na i taukei. Me sa vakalailaitaki na polo , me sa vakalevutaki na i sele me samaki kina na noda vanua kei na kena teivaki me rawa vakalevu kina na koula.

Toso Viti, Toso!

I ni Tui 21: 3 A sa kaya vei Eapi o Nepoci me kakua sara vei au ena vuku i Jiova me�u solia vei iko na nodra i votavota na noqu qase.

Oqo na noda vanua e solia vei keda na noda Kalou me vakalougtataki Viti na Kalou ko Jiova.

POASA TURAGALEVU

Tailevu.

More Stories