Na veivosaki bibi ena Bose Vakaturaga e Suva

Update: 11:03AM NODA Railesu e na macawa oqo eda na wilika kina e dua na veivosaki bibi ka a vakayacori e na gauna ni Bose Vakaturaga.

Ni tei wilika sara mada yani na veivosaki bibi oqo ka a vakayacori e na yabaki 1963:

E na Bose Vakaturaga ka a vakayacori e Suva mai na i ka 3 ki na i ka 6 ni Seviteba sa dromu ka a veivosakitaki ga kina e rua na ka bibi ka taura e rua taucoko na siga na nodra veivosakitaka tiko na Turaga na lewe ni Bose.

A i matai, na nodratou i vola tukutuku e dua na komiti ka a digitaki e na Bose Vakaturaga e na yabaki sa oti me vakadikeva mada e so na gacagaca ni veiliutaki Vakaitaukei kei na Lawa i Taukei; a i karua na nodratou i vola na Matabose ni Veika Vakaitaukei vei Nigel Fisher baleta na Yavu ni Vakavulewa e Viti kei na i vola baleta na tikina ko ya mai vua na i Liuliu ni Veikoloni.

Ni tekivuna na Turaga na i Talai ni Kovana A C Reid na Bose e a vakaraitaka taumada ni rua ga na ka bibi e a kacivi kina na Bose Vakaturaga, ka sa i ko ya ruarua oqo:

Na nodratou i tukutuku kei na i vakasala na komiti ka a lesi e na Bose Vakaturaga e na yabaki sa oti me vakadikeva na veiliutaki Vakaitaukei kei na Lewa i Taukei.

Na kena i karua na nodratou i vola na Matabose ni Veika Vakaitaukeivei Nigel Fisher baleta na nodrau veiwekani o Viti vata kei Peritania Levu kei na nona i vola na i Liuliu ni Veikoloni e na kena sa gadrevi tiko oqo me moici ka vakavoutaki na Yavu ni Vakavulewa e na noda Koloni.

Ko Fisher oqo e dua na i Vukevuke ni i Liuliu ni Veikoloni ka a tiko e Viti e na Janueri sa oti.

E kainaka e na nodra i vola na komiti ni veitikina ka ratou sa vakatura mai na nodratou vakadidike e ratou a vakasamataka kei na i naki ka ra a veisautaka kina na i vakarau ni veiliutaki Vakaitaukei, e na 20 na yabaki sa oti, na Gone Turaga na Talai Vakacegu sa bale, ko Ratu Sir Lala Sukuna ka ra a kainaka kina vakaoqo:

�Na i naki ni veisau oqo me ra tuberi kina na Veituraga kei ira na lewe ni vanua e na veiliutaki vakaitikotiko toro cake, e daumaka ka tuvaki vinaka me rawa kina ni ra yacova na bula vereverea ni mataqali Veiliutaki Vakatamata yadua.�

E ratou kainaka tale ga na komiti ko ya ni sa dua toka na gauna balavu na kena sa vakabauti tiko mai ni sa dodonu me toso ki liu na gaunisala ni toro cake na veiliutaki Vakayasana me la�ki yacova sara na kena sa dewa ki na kaukauwa ni veiliutaki vakaitikotiko dina na Yasana.

Na nodratou i tukutuku kei na i vakasala ko ya na komiti a vakadonuya na Bose Levu Vakaturaga ka mani kerea sara ki na Matanitu me lesia e dua na kenadau ka kila vinaka na i tovo kei na i vakarau ni bula Vakaitaukei me na rawa ni vakamacalataka ka vukea na kena vakarautaki e dua na i vola tukutuku matailalai ni Veiliutaki Vakaitaukei kei na Lawa i Taukei.

Sa mani vakaturi sara ki na matanitu me lesi ki na i tutu ko ya ko Dr Rusiate Nayacakalou ka vakarorogo ki na Matabose ni Veika Vakaitaukei.

E na kena bibi ni veivosakitaki tiko a taura kina e rua na siga taucoko ni Bose, na veika ka baleta na nodrau veiwekani ko Viti kei Peritania Levu kei na kena sa gadrevi oqo me na vakavoutaki na Yavu ni Vakavulewa e na noda koloni.

E na veivosaki balavu oqo e rau golevi tiko kina na i vola ni Matabose ni Veika Vakaitaukei kei na nona i vola na i Liuliu ni Veikoloni. E na rua na siga ko ya e ratou a vakamacala tale tikoga kina na i Liuliu ni Bose kei iratou na noda Mata ki na Bose Lawa, me ratou vakamatatataka na vanua me goleva na nodra vakasama na lewe ni Bose.

Ni sa matata vinaka ka tu donu na nodra vakasama na lewe ni Bose, sa qai vakadonuya na Bose Vakaturaga me sa tokona vakaukauwa na veika kece ka ratou a vakarautaka e na nodratou i vola na Matabose ni Veika Vakaitaukei vei Fisher.

Sa vakadonuya talega na Bose me sa na yavu ni veivosaki ni nodrau veiwekani ko Viti kei Peritania Levu, na lewe ni i vola mai vua na i Liuliu ni Veikoloni, ia, me sa matata taumada tu ni na qarauni na veika ka ratou a dusimaka tu e na nodratou i vola na Matabose ni Veika Vakaitaukei ni bera ni veivosakitaki na vakavoutaki ni Yavu ni Vakavulewa.

E na veivosaki ko ya sa vakadonuya kina na Bose Vakaturaga me sa vakacolati sara ga vakatabakidua na kaukauwa vei iratou na noda Mata ki na Bose Lawa me ratou veivosaki kina e na vukuda.

Ia, e gadreva na Bose Vakaturaga me dua mada na nodra veivosa taumada na Mata ni veimata tamata e Viti kevaka e so na ka bobo era duidui kina.

E vinakata na Bose Vakaturaga me rogoci ira tale mada kina ni sa bera na lako ki Peritania.

Ni vakarau tini na Bose e na i otioti ni siga a qai vakacaucautaka kina na i Liuliu ni Bose ko Reid na i vakarau ni veivosaki e na rua na tikina bibi ka baleti keda vakatabakidua na i Taukei ka vakavinavinaka kina vei ira na lewe ni Bose.

More Stories