Na veitosoyaki kei na veiqaravi

E DUA na macawa osooso, ka levu sara tiko na veitosoyaki ena noda vanua na macawa oqo.

Matai, ni sa sereki tiko na vuli, era vakacagicagi toka me macawa rua o ira na luveda.

Kena ikarua, na soqo ni lotu e vakayacori tiko ena nodratou soqo vakayabaki se Koniferedi na Christian Mission Fellowship kei na bose ni wasewase e 58 ena loma ni Lotu Wesele.

Mai na wasewase o Lau, era veiqaravi ena yabaki oqo na yanuyanu o Ogea.

E dua na ka eda vakavinavinakataka e Viti, ni levu vei keda eda sega ni guce se via suka i muri ena vuku ni qaravi i tavi ena vuku ni lotu, se na i tavi ni vanua, na noda i tavi ni vuvale kei na vuli.

Vei keda na kawa i Taukei, e dau vakabibitaki vei keda na qaravi ni tavi ni noda lotu, na vuli baleta ni da sa kila na yaga ni vuli ena noda bula kei na vuvale.

Sa qai tiko talega na i tavi ni vanua, baleta ni o keda na i Taukei, e tiko na noda koro, na mataqali kei na yavusa, e da sema bula kina, ka sa tiko talega na kena i tavi meda na colata tiko ena veigauna.

E sa dua na ka na tabili ni tamata, kei na veitosoyaki e vakayacori tu oqo e Viti, ena vuku ni levu ni soqo ni lotu, na vuli, na vuvale, na vanua.

E na soqo ni Koniferedi e vakayacori tiko e Kinoya, e na lotu na CMF e totoka ka rogorogo vinaka na tukuni yalo kei na veika era sotava na gone ni Viti era soli bula ena nodra cakacaka ni kaulotu ena vanuatani me vakataki Aferika, ena Pasifika, e Esia. E da kureitaki liga, ka da qoroqoro ena vuku ni veika esa cakava tiko na Kalou ena kena caka na soli bula ka qaravi vakavinaka na Kalou bula, ka Dauniveibuli.

E da kalougata e Viti, ni soli tu na galala ni qaravi so kalou, dina madaga ni da tu veimaliwai kei ira na mata vakabauta tale eso.

Ia, e solia tu na galala na noda matanitu ena vuku ni noda lotu kei na mata vakabauta cava eda via lewena. Ena macawa talega oqo e vakayacori tiko kina na bose e Palimedi mai na siga Moniti ka vakacavari yani ena siga Vakaraubuka.

Era laki bosea kina na noda i liuliu na veika me baleta na noda tiko vinaka na lewenivanua e Viti.

Eso na taro kei na veika e da kauwai kina na lewenivanua, era dau kauta cake na noda mata e Palimedi me ra na laki veitalanoataka ka vaqara na kena i wali. Ia, eda sa vakanuinui kece tu ni na daumaka tiko na i vakarau ni veitalanoa ena loma ni Bose Lawa oqo ka me na tutaki kina ka veitalanoataki kina na veika e tara cake na bula ni lewei Viti.

E levu na taro vinaka kei na ulutaga e dau veitalanoataki ena loma ni Bose Lawa e dau vakavure veitalanoa ka tiki ni noda raica tiko vakabibi na lewei Viti na veiqaravi ni matanitu ena kena sagai me da tiko sautu ka tiko veilomani na duikaikai.

Eda vakavinavinaka talega ni sa mai tavoci oti ena Lotulevu sa oti na noti vou kei na 50 na sede ka taba kina na i vakananumi tudei ni veika eratou rawata mai na noda toa ni vala ena i matai ni koula ena noda vanua ena qito levu oqo na Olympics.

E da vakavinavinaka kina ena kena vakasama me caka e dua na i vakananumi vakaoqo me rawa ni da vakananumi tiko kina ena vuku ni tavi levu ka rogo kina o Viti ena qito oqo na rakavi kei ira na veimatanitu lelevu ka rogo ena noda vuravura.

E da vakavinavinaka talega ni sa mai qaqa ena qito levu ni Coca Cola Games na mata timi ni Sawani, a Adi Cakobau School vei ira na goneyalewa kei ratou na koronivuli mai Lautoka na Natabua High School vei ira na cauravou.

E levu sara na veisau kei na toso e sa laurai ena kena cicivaki na qito ena yabaki oqo, ka sa kalougata talega o ira na cauravou kei na goneyalewa era mai tauri cocovi ni oti na qito ena yakavi ni Vakarauwai. E sa levu sara na i cocovi vinaka era solia mai na veikabani e Viti me dolei kina na nodra gugumatua na gonevuli era vakaitavi sara vakavinaka ena qito oqo.Vakanuinui vinaka ni na dua na macawa vinaka ni qaravi i tavi na macawa oqo vei keda kece.

More Stories