Na veisereki ni Kalou

NA i ulutaga e na yabaki oqo, e dua na vakamamasu: Turaga ni sereka ka vakabula na neimami vanua kei keimami na lewena.

Ko ni na raica ni na wase tiko vakatolu na noqu vakamacala. Nai matai ni kena iwasewase sa ikoya noqu dusia e so nai rairai se ituvaki ni vesuki ni bula kei na vanua.

Kena ikarua, au na tara tiko kina ko ira era vakavuna na vesuki ni bula kei na vanua.

Na kena ikatolu au na tara tiko kina na sala vakayalo me sereki kina na vanua kei na nodra bula na lewena.

Sa vakatubu rere na veika sa yaco tiko e Viti ena gauna ‘qo. Ni da vakarorogo walesi se wili niusiveva, sa tuburi keda na rere, cudru kei na loloma levu ena veika sa vakayacori tiko vei ira na goneyalewa lalai.

E na veisiga taucoko, e sega ni sega, na kena vakayacori nai valavala rerevaki ka veivakalolomataki vei ira na luveda.

Na ka e rerevaki ka mosi kina, ni levu na ivalavala butobuto ka lolovira oqo e sa vakayacori sara tiko ga e na loma ni vuvale vei ira sara ga na wekadra na goneyalewa.

Era okati kina na tamadra dina, tukadra dina, tamadra vakacabecabe, na vugodra, na tuakadra kei na tavaledra. Oqo e dua nai rairai ni veivesu ka vesuki tu kina na bula kei na vanua.

Na noda valeniveivesu sa sinai vei ira na vakayaco cala lelevu: e na laba, butako, veivaqumi, waigaga ni veivakamatenitaki kei na sala dukadukali ni veivoli kei na veivolitaki.

Eda kaya ni sa vakararamataki keda na vuli, ia sa qai butobuto vakalevu ga na noda vanua ena itovo vakasisila ka vakadomobula.

Na nodatou koro mada ga oqo o Suva, e 26 taucoko na valenidanisi e tiko kina.

E da raica ni da mai lotu ena vei Siga Tabu, era se vakasinaita tu noda veitolo ni sala na cauravou kei na goneyalewa i Taukei ka ra vakasesei tu ena yaqona ni vavalagi kei na waigaga ni veivakamatenitaki.

Sa tubu cake nai wiliwli ni gone lalai qai sucu era kune e bati ni sala, ena makete, e qara ni valelailai, ena ibenubenu kei na salasala ni wai, ni ra sa drotaki ira na tinadra, ka ni levu vei ira era se gone talega.

E dua dina na veivesuki levu sa tara tiko na noda bula kei na noda vanua.

Sa tubu cake na levu ni dravudravua, aya na dravudravua ni vakatulewa, dravudravua ni yalomatua kei na dravudravua vakaiyau.

E sautu na qele, ia e dravudravua na yalomatua ni kena vakayagataki, era sa bini tu nai tei, ia era sa lai tao kece tu ena makete.

Sa biu tu mai na koro ka ra sa yau mai ki tauni na lewena, ia ko ira era vo tu yani, dina ni ra sa toso tu, ia era yali se malumalumu ko ira e dodonu mera veiliutaki.

E sega ni wiliki rawa na veivuvale kavoro ena veiyabaki, ka sa qai tubu cake ga na cauravou kei na goneyalewa era sa goleva na sala verevereya ni nodra vakacacani ka vakalolomataki.

Oqo dina nai tuvaki ni bula vesuki.

Ni da veivosakitaka na vanua, eda tara tiko na qele, na uciwai, na waitui kei na veika kece sara era bula kina.

Eda tara tale tiko ga na tamata era bula ena vanua, okati kina na turaga kei ira na lewenivanua.

E dua na dina levu vakaivolatabu, ni tuvaki ni dua na vanua, e vakatautaki e nai tuvaki ni tamata era bula tiko kina. Kena ibalebale ni na ca na vanua e na vuku ni nodra ivalavala ca ko ira era tikora na vanua.

Ni levu na veisei, na duiduile, na nanumi koya vakaikoya kei na nodra vakanadakuya na Kalou na lewenivanua, sa muria ga mai na vakarusai ni vanua ena veimate ca, na cagilaba kei na ualuvu, na itovo kaukauwa, lolovira ka dukadukali kei na kena sa yali na yalo ni veirogoci kei na veirokovi.

Sa vakasucuma na vanua e dua na itabatamata rerevaki ka vakadomobula.

Niú vakaraica tiko na veileqa lelevu sa vesuka tu oqo na vanua, au sa via tukuna vakadodonu ni vuqa na leqa oqo era vakavuna tiko na tagane se turaga.

Eda raica ena Vakatekivu 3:17-19, ni cudruvi na vanua e na ivalavala ca se malumalumu ni tagane.

Ni da raica na bula nei Ilai na Bete ena nona sega ni tarovi rau na luvena ena ca erau vakayacora tiko ka vakavuna na vakadrukai ni mataivalu ni Isireli kei na kena kau tani na kato ni veiyalayalati.

E vakaleqai e dua na matanitu taucoko ena nodratou cala na veitamani.

E vakakina o iratou na Tui Isireli; o Saula, o Tevita, o Solomoni na luvena kei ira na vicasagavulu ni Tui era qai muri iratou.

Nodra ivalavala ca e vakarusai kina na nodra matanitu.

Na levu ni itovo ca e yaco tiko oqo e Viti, era vakaitavi vakalevu duadua tiko ga kina na turaga.

Na leqa e tiko ni ra vakatokai taucoko na tagane me turaga. Sa tu mada na Turaga na Kalou kei Jisu Karisito na Luvena, era sa qai tiko ko ira era sucu turaga ka da vakatokai ira mera turaga ni veivanua e Viti.

Oti oya, era sa qai vakatokai tale me turaga na tagane kece e Viti.

Era turaga vakacava ko ira oqo, ni ra vakayacora tiko na itovo ca ka lolovira?

Ia na leqa talega oqo eda vakavuna tiko na marama se yalewa. Dina ni da tutaka na noda vakatautauvatataki na tagane kei na yalewa e vuravura taucoko; ia ena yaga me matata tiko se cava dina na loma ni Kalou me baleti keda.

Sa daumaka na vakaukauwataki ni dodonu ni tamata yadua kei na dodonu ni marama, ia meda qarauna meda kakua ni veicoqacoqa kei na dodonu ni Kalou.

Na dodonu kece, e dodonu me salavata kei na bibi ni noda raica me kakua ni lai vakacacana nodra dodonu eso tani tale.

Ena yaga meda qarauna na kaukauwa kei na vakayagataki cala ni dodonu nei Jesepeli kei Erotiasa e nai Vola Tabu.

Ena gauna vou oqo, sa levu na marama kei na goneyalewa era sa gunuva na yaqona ni Viti, tavako, yaqona ni vavalagi ka ceruma na waigaga ni veivakamatenitaki.

E dua nai tabatamata vou ka ra sega ni kila na Kalou.

Sa qai tu ko ira era biuta nodra vuvale ni ra sa lasavi vuravura.

Ko ira na gone era biu tu mai, era tini ki na so na vanua vakaloloma ka rerevaki kevaka e sega ni taucoko na veiqaravi era qaravi kina.

Ni sa duka ga na wainisucu eda solia vei ira na luveda, sa na duka talega na nodra bula kei na vanua era tiko kina.

Au vaqaqa tiko se cava sa yaco tiko vei keda na umatamata i Taukei e na gauna ‘qo. E nai tuvatuva ni noda bula vakaitaukei, e dua na ka bibi sai koya na noda veivakaturagataki.

Ni davo donu na vanua ena nodra veiliutaki na turaga ena loloma kei na veinanumi, ka ra qarava vakadodonu nodra itavi na lewenivanua, ena saravi ga na totoka ni bula ena vanua.

Ena sega na veikalawaci, sega na vosa vakaveitalia, sega na veileti se dui kaunona.

Era na bula na lewenivanua e na veilomani, veirokovi, veikauwaitaki, veivakabauti ka ra vauci ena draki ni yalovata, lomavata, duavata kei na cakacaka vata.

Na Yalo Tabu ni Kalou e i taukei ni vata, eda wasea na veika e tu vei keda, na kakana kei nai yau, e na sega ni dua e biu tu ka ni da veirairaici ena noda toso vata tiko.

Me vaka na vosa ni veivakalougatataki e dau rogo ena noda veiqaravi vakavanua; ena ruru na cagi ni yabaki ka cabe na ika mai takali, e na sautu na vanua e na vua ni qele, na vuata kei na kakana draudrau.

Esa drava noda iqoliqoli ka lala mai noda lololo ni kakana kei na vuata mai veikau. Sa veitaravi mai na cagilaba na waluvu!

Na matanitu levu sa vakabibitaka na toso ki liu e na vakasama ni veivakatorocaketaki. Sa soli ki na veikabani lelevu mai vanua tani me ra qarava e vuqa na cakacaka ni veivakatorocaketaki ka sa rawa mai kina na ilavo lelevu.

Ia me qarauni ka ni dau rua tiko na yasa ni veivakatorocaketaki kece.

Ena dua na yasana sa rawati nai lavo lelevu, ia e na dua tale na yasana, sa vakarusai kina noda veitiki ni qele, noda veiuciwai kei na wasawasa ka ra mate kina e milioni na veika bula era ivurevure ni bula vei keda.

Eda raica ena Vakatekivu 1:28, ni oti nona bulia na tamata na Kalou, sa lesi koya me cakacakataka, maroroya ka vakatawa na vuravura kei na veika kece e tu kina. Oqo e i lesilesi Vakalou ki na tamata!

Na Same 24 e dusia vakamatata ni sa nei Jiova ko vuravura kei na ka kecega sa sinai kina, na tamata kei ira era tiko kina

Na Kalou e i taukei ni ka kecega, na tamata e i vakatawa walega.

More Stories