Na veiliutaki

E ratou taba vata tu oqo na lewe 20 na turaga mai na yasana e rua o Tailevu vata kei Rewa, ka ratou taura na nodratou Sitivikiti III ni vuli na Sauvaki ni Vanua ka vakacavari mai Nadave e na Vakaraubuka ni macawa sa oti. Veitaba: SIKELI QOUNADOVU

ERATOU kalougata e lewe 20 na turaga mai na yasana o Rewa kei Tailevu ni oti na vuli ni veiliutaki vakavanua me na muria e dua e taura tiko na i tutu ni veiliutaki se ‘Turaga’ ena loma ni va na vula, ka mai cava tiko ena Vakaraubuka sa oti.

Era mai tauri sitikifiti III ka vakarautaka vata na vuli oqo na Matabose ni Veika Vakaitaukei.

E dua na siga lagilagi vei ira na turaga, e na nodra taura kina na Sitivikiti III, ka ra mai vakacavara kina na vuli ka vakatokai na ‘Sauvaki ni Vanua.’

Na vuli oqo e vakarautaka na matabose kei na veitokoni ni Tabacakacaka i Taukei ka vakavulici vakatabakidua sara ga kina na veiliutaki vakaturaga e na noda vanua.

Ni sauvaki na vanua e na vuli oqo, e vaqaqacotaki kina na kena gadrevi me uasivi cake na nodra veiqaravi na veiliutaki, ka me basika kina na bula, mana, kei na sautu ni vanua.

Na bula ni dua na vanua e na vakatau vakalevu e na kena tutaki ka maroroi na vosa, itovo kei na i vakarau ni veivakaturagataki.

E wasei ka sereki vakavinaka ena parokaramu oqo na vakasama ni vanua, na iyaubula kei na veiliutaki vakavanua.

E vakamacalataka o Ratu Masi Saqanavere mai na Mataqali o Coladuki, ena koro ko Nawaisomo, Beqa, ka mata ni Tikina o Raviravi ni dua na vuli levu e mai vakarabailevutaka talega na nona rai.

Tomana o Ratu Masi, 60, ni matataka mai na tikina o Raviravi ka marau vakalevu ni mai lewena na vuli bibi oqo.

Tomana ni ra vulica sara ga vakamatailalai na vanua kei na kena veiliutaki, na iyaubula, na veika eda dau vakamareqeta nai Taukei, kei na bibi ni veika e tubu wavoliti keda, na i qoliqoli kei na lotu, e tiki kece tiko ni vuli oqo.

E kuria ni kalougata ni bau digitiki me dua vei ira na na turaga me isevu ni vuli oqo e na yasana o Tailevu kei Rewa ni bera ni qai dewa yani ki na veiyasai Viti.

E vakamatatataka ni veika e vulica oqo, era na la’ki vakadewataka ki na nodra veikoro, ka dewa sara yani ki na nodra Tikina me rawa ni solia e dua na i yaloyalo ki na Tabacakacaka i Taukei ni sa yaga na veika era vulica mai Nadave.

Ia, e tomana na vakavinavinaka o Ratu Bolabasaga Veikoso na turaga ni Toranaibati, Buretu, e Tailevu, ka dua talega vei iratou na lewe 20 ka ra tauri sitivikiti e na macawa sa oti.

E kaya o Ratu Bolabasaga ni vuli e vakararamataka sara ga na nona rai me baleta na noda i tovo, ka vakakina na veiliutaki e na nona vanua.

“Au vakavinavinaka vakalevu ni vuli oqo e vakauqeti au sara ga ni’u se cauravou tiko, ka rawa vei au me’u vakavulici ira na noqu i caba e na loma ni noqu koro e na i tovo ni i Taukei, ka da kilai tani kina e na veiyasai vuravura.

“Eso na ka au sega ni kila, au sa qai mai kila, eso na i vosavosa e sa yali e na noqu vanua, au sa qai mai rogoca tale e na vuli oqo.

“Oya e so na veika au sotava me baleta na itovo ni veiliutaki, ni noqu qase e se qai leqa tikoga e na vica na vula sa oti.

“Eso mada ga na veika e sega ni kila o noqu qase, au sa mai vulica e na vuli oqo, ka’u sa vakavinavinaka sara ga kina vakalevu,” e kuria.

Sa nona i vakasala ga o Veikoso kivei ira na i tubutubu me ra dau vakadreta vei ira na luvedra na i tovo kei na i valavala ni nodra vanua, ka rawa ni vakaraitaki ira e na veiyasai Viti cava ga era gole yani kina.

Tomani ena Tabana e 2.

More Stories