Na vanua o Nasaibitu

Update: 11:17AM OQO na i tukutuku tabaki mai na Fiji Museum me baleta na nodratou vakadidike ena veika makawa kei na i yaya maroroi ena loma ni mataqali ko Nabitudua ena koro vakaturaga o Nasaibitu, Waibuka e Tailevu.

Ni wiliwili sara yani.

NA koro ooqo ko Nasaibiutu e tiko ena loma ni tikina o Wainibuka ka vakarurugi ena loma ni yasana o Tailevu.

A dabe toka na koro oqo ena vua-i- cake kei Viti Levu rauta ni 920 na mita varivirivi mai kina loma ni gaunisala levu na Kings Highway.

Veimama ni dua na kilomita vakalailai yani e liu, a toka kina e rua na tokaitua, na vanua eratou a kerea me lai vakadikevi, maroroi ka me vakalawataki na kena taqomaki ka yaca ni vanua toka e rua oqo ko qelema kei Koroanamu.

Ena tukutuku a tauri rawa mai vei ratou na lewe ni mataqali, na qele oqo a taukeni vakamataqali ka wili me nodra vakatabakidua na lewe ni mataqali ko Nabitudua.

Ena loma ni vanua oqo, me vaka na nodratou veivakadodonutaki mai na Tabana ni qele ni a tiko kina e dua na i kovukovu qele rauta ni 15 na eka na kena levu ka wili toka vaka qele ni Yavusa.

Na lewe ni mataqali ko Nabitudua, mai na koro ko Nasaibitu eratou gagadre mai kina tabana ni vakadidike ni vale ni yaya maroroi me lai vakayacora e dua na vakadidike kina na loma ni vanua e rua oqo me lai vakadinadinaki kina na i tuvaki se i rairai ni qele ni mataqali a vakaraitaka toka mai na Tabana ni Qele ni Matanitu ni sa toka vakatikitiki e dua na i kovu qele me nona na yavusa ko Qelema ka ratou veikovuti kina e ono na kena tokatoka.

Sa toso totolo sara tiko na kena voleka ni laki vakacavari na veivakatoroicaketaki ena loma ni yasana.

Oqo ena kena sa mata ni saisai toka mai na veika eso me vakayacori kece ena dua ga na tiki ni vanua, me vaka na kena tara na veivale ni vuli ka vaka kina na veivale ni wilivola kei na kena tatadrataki tiko mai vei iratou na matanitu o Korea me duri e dua na kena Univesiti.

Ena vuku ni veivakatoroicaketaki qo, sa tiko kina na kauwai kei na kena rivarivabitaki ni na laki vakacacana ka vakayalia vakadua na nodratou yavutu.

Ena vuku ga ni nodratou kerekere ena kena laki vakdikevi na vanua ka vakabauti toka ni kovukovu ni vanua ni ko Qelema, ena kena sa laki vakayacori na vakadidike e a tauri rawa ni kunei sara kina e levu na i vakadinadina bula ni a tawani tu e liu.

Oqo ena kena kunei kina eso na tikitiki ni kuro ni viti makawa ka veivuke sara vakalevu ena kena vakadeitaki me maroroi me wili tu vaka i yau makawa.

Eratou veivuke sara vakalevu na lewe ni mataqali ena kena vakaraitaki ka vakamatatataki eso na veiyavu makawa, na veikoro makawa, kei na kena vagalalataki na veiyalayala ni vanua eso ka vukea na kena taqomaki na vanua.

Vakadidike ni dela ni vanua

Taumada ena vakayacori raraba ena dela ni Vanua a laki vakadikevi na veika eso e rawa ni kunei me veivuke ena kena kilai na i tuvaki ni vanua.

A vakayacori vinaka sara, ka ciciva e dua na vanua levu na veika e vakaraici ka yaco sara yani e gaunisala levu, bau wili talega kina na kena vakadikevi na veitokaitua, ka vakamuria sobu me yacova na kena bucabuca.

Oqo ena i naki levu ga ni kena sagai tikoga me rau vakadeitaki rawa na vanua e rua oqo ko Koroanamu kei Qelema.

(Macawa mai oqo qai tomani yani na i tukutuku me baleti Koroanamu kei Qelema).

More Stories