Na lawa kei na loloma

OQO tale na i kuri ni takitaki mai na macawa sa oti nei Nai Talatala Aisake Seru mai na Ratu Mara College e Tubou, Lakeba e na Yatu Lau.

Ni tei wilika sara yani.

Ko ira na Isireli era raica tu ga ni talairawarawa ki na lawa e vu ni veivakalougataki kei na veivakabulai vei ira. Dina nira dusia vakavuqa na Parofita ni cala na yavu ni nodra talairawarawa ki na lawa. Era kaya na Parofita ni sega ni rawa ni savasava na tamata e na ka e vakacabora e tuba, ni savasava vakayalo e gadrevi kina na talairawarawa ni yaloda.

E kena i balebale ni sega ni rawati na vakasavasavataki ni yaloda e na ka e vauca na lawa me vakayacori (rituals). Na talairawarawa ki na lawa me ka mai loma sega ni ka e caka me vaka na i vakarau (Aisea 1: 10-17; Osea 6:6; Emosi 5: 21-24; Maika 6: 6-8).

E vakasabusabutaka ko Isireli na lawa e na veitaba gauna, era nanuma ni nodra vakayacora na i vakarau e sa vauca na Kalou me ciqomi ira. Era sa vagolea na Isireli na lawa me sa nodra ga, me nodra na keba dodonu, na kena ka ni veivakalougatataki kei na kena veimaroroi (Jer 7:1-10, 21-26; 8: 8-12).

E na levu na gauna e sega ni dau vakabibitaka ko Isireli na lawa ni bula (moral standards) ka dau laveta cake ga na lawa ni vakacabaisoro (ceremonial rituals).

Era vakabauta ni raica na Kalou na yalodra e na rairai ni ka era vakacabora. Na ka era mai vakacabora era kauta mai ni vauci ira na lawa ka sega nira kauta mai e na yalodra dina (Aisea 1; Jer 7).

E vakaroti ira ko Mosese e na leqa e na yaco e na nodra sega ni muria na ka vakayalo e tiko e na lawa (Vakarua 4: 29;30).

Ni veivakaroti oqo e mai yaco me dina e na nona sa kau vakabobula ko Juta e na 586 ni Bera ni Sucu na Karisito.

Na i talanoa vakaciriloloma ni matanitu ko Isireli e basika kina na nodra sega ni rawata na loma ni Kalou, e sega ni vakavuna na Kalou, ia, era vakavuna ga ko ira era a kacivi mera nona ka vakamareqeti na Kalou.

E na qai tomani tale yani.

More Stories