Na Domo ni Parofisai mai na Lotu i Kavitu

ESA koto oqo e ra na i kuri ni itukutuku ni Domo ni Parofisai mai na Lotu i Kavitu ni Lesu Vakarua Mai, ni wiliwili sara yani.

Mai Iteni ki Iteni

Wiligusu: ?Ia, ka?u a raica na lomalagi vou kei na vuravura vou; ni sa takali na lomalagi makawa; ia sa segai sara na wasawasa.? Vakatakila 21:1

Na lesoni oqo e duidui mai vei iratou na liu, ka ni oqo e vakaraitaka na i tekivu ni vuravura me yacova na i vakataotioti. Vakawilika vakavinaka na nomu i Vola Tabu, ka ni tu kina e levu sara na ka e na sega ni vakamacalataki yani, ka dodonu mo kila.

Na ulutaga oqo e tekivu mai Iteni ka la?ki tini ni sa na veisautaka na Kalou na vuravura oqo me Iteni Vou. Eda na vulica eke e 12 na ka lelevu.

1. Sa buli na vuravura. Nai tekivu ni valavala ca.

Ni sa bulia oti na vuravura oqo na Kalou ena 6000 na yabaki sa oti, sa qai buli rau na Vuda ko Ivi kei Atama, ka solia vei rau me rau tiko ena were lagilagi mai Iteni. Ia, ko Setani sa qai kauta mai vei rau ko Ivi kei Atama na i valavala ca, ka sa mani rau biu tani mai Iteni ni rau sa i valavala ca vua na Kalou. Na nodrau i valavala ca oqo, e kauta mai na rarawa, leqa, vutugu kei na mate.

E rau lewe rua na luvedrau tagane ko Ivi kei Atama ko Keni kei Epeli (Vakatekivu 4:1-2). Ko Epeli e dau vakacabora e dua na lami me nona i soro, ka ni vakabauta ko koya ni na lako mai ko Jisu na Lami ni Kalou (Joni 1:29). O Keni e a talaidredre ni sega ni via vakacabora na lami, ka vakacabora ga na vuata ni qele. Ni raica ko Keni ni vakadonui ga nai soro nei Epeli, sa mai curumi koya na yalo ca ka labati tacina. Oqo nai matai ni laba.

E a so tale na luvedrau ko Atama kei Ivi ka ra vakaluveni tale na luvedrau, ka sa mani tubu me ra lewe vuqa na lewe i vuravura.

Ko ira na Peteriaki

E na gauna makawa ko ira na tama se i liuliu ni matavuvale e dau yacadra na Peteriaki. Ko na wilika ena Vakatekivu wase 5 na yacadra kei na balavu ni nodra bula. Eso era yabaki 900. Ko Meciusela e 969 na nona yabaki ni bula, na tamata bula dede taudua. Eso na tamata dodonu ka ra vakavulici ira na luvedra e na itukutuku ni veibuli kei na nodrai tavi vua na Kalou.

Na waluvu

Ni sa toso tiko na gauna era lewe levu sara era sa cata na vosa ni Kalou ena gusudra na Peteriaki kei na Parofita. Ia, ni oti e 1400 na yabaki mai na veibuli sa qai vakaraitaka na Kalou vei Noa na itukutuku oqo.

?A noqu Yalo Tabu e na sega ni veileti tiko kei na tamata me sega ni mudu…Ia na nona gauna e na dua tale na drau ka ruasagavulu na yabaki. A sa raici vuravura na Kalou ka raica sa vakasisila ni sa vakasisila nai valavala ni tamata kecega e vuravura. Ka raica koi au, ka?u na kauta mai e dua na waluvu ki vuravura me vakawabokotaka na ka kecega e ruku i lomalagi sa tu kina na i cegu ni bula, ia e na mate na ka kecega sa tiko e vuravura.? Vakatekivu 6:3, 12, 17.

Sa noqu masu me vukei keda na Kalou ena noda wilika, vakabauta ka muria na nona vosa.

Ena qai tomani tale yani.

More Stories