Na daurairai ki na vuniwai

NA gagadre ni dua na daurai me veiqaravi mai Laselevu esa vakavotukanataki kina dua na valeniwai kei na kena vuniwai.

Esa oti vinaka oqo e 50 vakacaca na yabaki na nodra marautaka tiko na lewenivanua e Laselevu na nodra valeniwai.

E vakaraitaka ko Epeli Navukula e dua na turaga ni Laselevu e sotavi na dredre ena nodra gadreva me bau dua na nodra valeniwai me rawa ni vakabulai ira na tauvi mate e na loma ni vanua qo ko Nagonenicolo.

Ia, na turaga sara ga oqo ko Navukula e dua vei ira na cauravou lailai e na 1950 vakacaca na yabaki ka bau vakaitavi tu e na kena kerei me bau dua na nodra daurai me rawa ni vakabulai ira na tauvi mate e na vanua vakaturaga oqo ko Namoto.

Oi au saraga e dua vei ira na gone ena gauna oya au vakaitavi e na kena kerei me dua na neitou daurai, oya na vuniwai e na gauna qo me rawa ni vakabulai ira na tauvimate, e kaya o Navukula.

E talanotaka o Navukula ni o koya e a bau talai mai vei ira na qase ena gauna oya me laki musuka mai na draunivia ka me mai lose kina na yaqona e na dua na dela ni yavu ni bure ena nodra vinakata me bau dua na nodra daurai me rawa ni qaravi ira na tauvimate.

Ni oti na veiqaravi ni kena kerei me dua na neimami daurai ka sa mai oti vinaka e rua na yabaki esa basika mai na i tukutuku ni na veisiko mai nakoro e dua na vuniwai, e kaya o Navukula.

A mani veisiko sara mai vei keimami ko vuniwai Ro Dovi, ka mai tukutuku me sa na tara e dua na neimami valeniwai.

E vakaraitaka ko Navukula ni a mani solia na yavusa Nakoidrau e 5 na eka na qele me dabe kina na valeniwai me rawa ni tara kina na valeniwai qo.

Au a mani tiloma lo e lomaqu ni keimami a sova yaqonataka me dua na neimami daurai ia oqo esa mai dua saraga na neimami valeniwai me keimami na qaravi kina, e kaya o Navukula.

E kuria o Navukula ni levu era sa mai rogoca na i rogorogo ni valeniwai qo kei na kena mai tara rawa e na nodra veivuke na tikina o Muaira ka tara rawa e dua na vale katu lima, na tikina o Noemalo e nona i tavi na vale katu tolu, ka tara o Nabobuco na valenikuro.

Ia, o keitou e Laselevu keitou sa mani vakaitavi e na kena tarai na valenivakacegu, e kaya o Navukula.

E kaya na turaga dau vosavosa lasa qo ni i matai ni nasi e lesi yani me laki bolea na veiqaravi ena ulu ni colo oya ko nasi Virisila na marama ni Nadroga kei vuniwai Samu Kata mai Rewa nai matai ni vuniwai me gole yani ki Laselevu.

Ena gauna esa mai tekivu kina na valeniwai e Laselevu esa mai oti talega kina na vakasama ni daurai se na daurairai ka dau qaravi ira na tauvimate e na gauna oya.

More Stories