Na bibi ni veivakaturagataki

ENA ika22 kina ika23 ni June ni vula qo, a vakayacori kina ena rara ni qito e Laucala ka vakatokai na FMF Dome, na soqo ni siga kei Totoya. Qo e dua na sasaga kara bucina vata na masi ni vanua o Totoya me rawa ni ceguvi kina na ituvatuva ni Yasana ka vakauasivi na vakaitavi ni vanua ena cicivaki ni bisinisi kei na vakatubu ilavo.

Ena Bose ni Yasana o Lau ena yabaki sa oti ea mai vakaitavi kina na iVukevuke ni Vunivola Levu ni Lotu Wesele ko Talatala Ili Vunisuwai ka mai veivakararamataki ena vuku ni noda dravudravua na itaukei ena dela ni noda vutuniyau.

Sa ikoya oya na vanua eratou sa duavata kina na masi ni vanua kei Totoya ka vakayacori kina na kena tuvai, ka cakacakataki e dua na ituvatuva ni dua me vaka ea qai vakadinadinataki ena siga Lotulevu kei Vakaraubuka ni macawa sa oti.

Era a vulagi dokai kina o Roko Sau ko Roko Josefa Cinavilakeba, ka vakayacori kina vei ira na veiqaraqaravi kece vakavanua ka kilai tani ga kina na vanua o Totoya kei na kena veiyavusa. Nira sa vura mai na turaga Roko Sau ena mataka ni siga Lotulevu sa totoka ka Vaka na i Vana ni Rogovoka na kedra irairai ka vaka kina nodra sa dabe vakanomodi tu na lewe ni nona yavusa ka tukuna tu na nodra vakaturagataka ka rokova nira sa vura na nodra isakisaki sai ira na turaga Roko Sau.

Na vosa ni veivakamenemeni vakaturaga ena gauna ni veiqaravi vakavanua e vakaraitaka na nodra dinata na nodra itavi vakavanua kivua na turaga Roko Sau.

Ni cabori e du ana kamunaga qai talisaisaitaki kina me kilai na sala ni veiwekani e veiwekani kina na itutu vaka Roko Sau kina vo ni 5 na yavusa ena yanuyanu o Totoya ka bau kina na yanuyanu o Vanuavatu nodra itikotiko na na turaga na Tui Vanua. Sa vakamatalau dina nida sarava ka vakadinadinataka ni dau sota na vanua kei na kena veiwekani e vaka e dau tibi na liva nira sa dui vakaraitaka na kena itovo kei na kena ivalavala mera vakaraitaka kina nodra marau.  Au  nanuma kina na vosavosa vakaviti oqo ‘Dravusani La na Bukebuke e Cere’ qo e dau vakaliuci tikoga na turaga, se votai na magiti me vakalelevu ga na kedra i bilibili na turaga.  E vaka tu oya na irairai ni veika e vakayacori tiko vua na turaga Roko Sau ena gauna ni veiqaravi vakavanua.

Ni sa qaravi oti na veiqaravi vakavanua, sa qai dola na buturara ni nodra tau soli kei na nodra meke vakavanua ka bau kina na vucu.  Na vei mata meke kece sara ena 5 na koro, e yavala na valelevu qo e Laucala nira sa tu na veiwekani vakavanua mera vakaraitaka ka cibitaka na nodra delaniyavu ka dina nira sa mai tu ena vanua ni cakacaka ena noda Viti.  Sa dina kina na nodra vosa na turaga na Tui Cakau sa bale ka vaka qo;

‘na itaukei na veirogoci, baleta nida rogoci, ka meda vakarorogo. Na itaukei na veiwekani, ka ni wekadra ka ra wekana.

Na itaukei na veirokorokovi, nida vakarokoroko e da na qai vakarokorokotaki.

Na itaukei na veimaliwai, ka ni maliwai ira, ka maliwai koya.

Na itaukei na vanua, ka ni taukena ka taukeni koya’

Dau sega vakadua ni lasu se druka na nodra dau vosa vakaibalebale na noda qase baleta nira sa lako curuma oti na veigauna eda se qai lako curuma tiko qo, ka dau lau kina na vosa vakaibalebale vaka oqo.

Ni sa soli oti e dua na koro kei na nona veivakamarautaki, ratou curu maliwa toka na matasere kilai ni yanuyanu o Totoya na Voqa ni Ua kei Davetatabu ka vaka era cula na lewe ni yavusa raraba ena dua tale na kaukauwa nira tu cake na itaba qase cake mera meke ka vakaraitaka nodra marau nisa tubu cake tikoga na ivakatagedegede ni bula ni soqo.

Era qai vakayacora na turaga Roko Sau e dua na ivalavala, sai koya na nodra wasea na iyau kei na magiti era a qaravi kina, vei ira kece sara nona lewe ni yavusa kara matanataka kina na vosa oqo na ‘itovo’ sai koya na veinanumi, vakarokoroko, veidokai, yalo malumalumu, veivosoti me vaka na veika e tukuni ena iVola Tabu ena Maciu Wase 5 ena Tikina 3 kina 16, sa veireguci dina na loloma nira vakaturagataka na turaga Roko Sau qai dolei ira lesu ena nodra veivakaturagataki.

E ratou namaka na komiti kei ratou na masi vanua me kumuni e $15,000 ia ni mai vakacavari na soqo siga rua oqo ena Vakaraubuka e rawati e $32,689.50 ka tubu cake tikoga na nodra marau.

Sa itakele dina ga ni noda bula na kawa itaukei na solesolevaki, eda na tu vata ga e rawa na itavi.

Ea dau rogo italanoataka tuga, ia nida sa mai bula donumaka tiko qo na dina ni solesolevaki sa kena ibalebale meda kua ni rere se taqaya meda tucake vata kada tara cake na noda vanua ka meda kakua ni rogoca tiko.

Ea bau vakaivotavotaka talega na nomuni Tabacakacaka Taukei ena nona mai vakaitavi ena cakacaka ni veivakararamataki ena itavi ni Tabacakacaka ka vakauasivi na kena mai vakadinadinataki na mana vuni ni vanua ni dau vakaliuci na Kalou eda vakabauta.

More Stories