Me veisau

KEVAKA eda vinakata me kua ni vakanaulu sobu na noda timi ni rakavi lewe ya vitu, e sa dodonu me vakayacori e levu na veisau.

E vakadeitaka mai na dauni veivakatavulici ni timi ni Nadi, ka sa tokara oti talega na siqeleti vulavula ni timi ni Viti o Savenaca Aria, ni sega sara ga ni dua na i tuvatuva ni qito e tuvalaka tu o Gareth Baber me ra vulica na noda toa ni vala.

E sega ni tiko vei iratou na qito e na yalo kaukauwa, ka sega na i tuvatuva me ratou vulica e na nodratou gauna ni qito.

?Au sa kerea sara ga kevaka me rawa ni veisau na dauniveivakatavulici, ka kena i karua me ra kau tale yani na tamata makawa.

?Raici iratou na timi ni Niu Siladi, na nodratou vaqitori ira tale mai na tamata makawa, e ratou druka sara ga kina vakaloloma na noda cauravou e na i karua ni nodratou sota,? kaya o Aria.

Tomana ni timi ni Viti e sa dodonu me ratou lewena tale o Pio Tuwai, Isake Katonibau, Masivesi Dakuwaqa, Taliga kei Ravuvu.

?O iratou na cauravou qo e ratou kila sara vakavinaka na qito lewe ya vitu.

?E rawa ni ratou dreti ira mai na i to kadua, ni ra bera ni qai vakaleleca yani na polo.

?O iratou na qito tiko qo e vaka e ratou sa vakamuria tu ga na kui ni wai.

?Sega sara ga ni da raica ni tiko vei iratou na yalo ni qito, au sega sara ga ni kila se cava e leqa? kaya o Aria.

Kuria ni sa rui levu talega na nodratou cici vakababa, ka sega ni curuma yani na i lati ni tataqomaki me vaka e ratou dau cakava na cauravou, ka sa volai koto oqori e cake na yacadratou.

E kaya o Aria ni nona sa vola tu e na niusiveva o Baber ni ratou na la?ki qaqa mai Ositerelia ni se bera mada ga ni tekivu na sotasota.

Qo e sa dua na tamani veivakalaboci levu, ka rawa talega ni vakavuna na nodratou sega ni la?ki qito kina vakavinaka na cauravou.

E dua na i vosavosa vaka-Viti na ?Sivi mada na koro qai kalu? e dodonu me tau vei Baber, ka me liu mada na raravisa qai rawa ni o kunea na qaqa.

Tomana na turaga ka kilai tani na ceba e tu vua e na gauna ni nona qito ni dodonu me ra la?ki vakacicivi tale mada na noda cauravou e na veinuku mai Nadroga.

Raici Ben Ryan na nona kauti iratou na cauravou na la?ki tereni e na veinuku mai Nadroga, e duatani sara ga na i vakarau ni qito e ratou la?ki vakaraitaka e na sotasota mai Rio.

E kaya o Aria na ka e rau duidui kina o Ryan kei Baber, oya ni o Ryan e kila vinaka na cauravou me biuta e loma ni rara, ka kila vakavinaka talega na gauna me veisautaki ira kina.

O Ryan talega e vakatovolei ira kece mai na cauravou e na gauna ni qito vakatobu, ia ni sa yacova mai na kota, semi kei na fainala, e sa digia sara ga e kea o koa na cauravou me ratou na valataka yani na noda vanua.

Ia, o Baber e sa rui levu na nona veiveisautaki ira na cauravou e na gauna taucoko ni qito, ka vakaraitaki oya ni sega tiko ni kila na cauravou cava me digitaka ni sa tekivu na kota fainala.

?Na valataki vanua vaka oya e sega ni qai mai caka tale tiko kina na vakatovolea, baleta ni nona digidigi e dodonu me raica rawa e na gauna ni qito vakatobu,? kaya o Aria.

Sa nuitaka tiko na dauniveivakatavulici ni timi ni Nadi ni da na masulaki iratou na cauravou e na macawa qo, ka me dua na veisau e ratou na la?ki matanataka yani e loma ni rara.

More Stories