Me vakaivolataki mada

Update: 12:22PM E DODONU me na vakamatatataki mada e liu na veika vakaivola ena vuku ni veisau esa vakatura tiko mai na Minisitiri ni Vuli me baleta na nodra vakacurumi na gonevuli era na laki vuli ki na koronivuli e tolu o QVS, RKS kei Adi Cakobau ena yabaki vou.

Vakaraitaka na veika oqo na Peresitedi ni soqosoqo ni gonevuli oti mai Adi Cakobau, o Adi Litia Qionibaravi.

E kaya ni levu na veika e yaco tiko, e rogovaki tikoga ena veitabana ni tukutuku.

E vakadeitaka talega ni ratou sa kerea oti na i soqosoqo vei Doketa Mahendra Reddy me dua na nodratou veivosaki ena vakatutu oqo ni matanitu.

E kaya talega o Adi Litia ni sega ni ka rawarawa na veika eratou sa tuvana mai oqo na Minisita ni Vuli, ka dodonu me na yavalati tiko na nodra bula na gonevuli oti, na i tubutubu kei ira kece era kauwai ena vakatulewa oqo.

E sa mai kacivaka oti ena tekivu ni vula oqo mai Vanua Levu na Minisita ni Vuli, o Doketa Reddy ni sa na veisautaki na i tuvatuva ni nodra vakacurumi na gonevuli oti e na koronivuli e tolu oqo.

E a vakadeitaka talega na Marama Bale na Roko Tui Dreketi, o Ro Teimumu Kepa ni sega ni dodonu me na veisautaki e dua na ka ena vuli, kevaka e sa tu na vua kei na mawe ni veiqaravi ni dua na koronivuli.

Me vaka eda kila vinaka ni koronivuli o Vulinitu, o Ratu Kadavulevu kei Adi Cakobau e sa susugi mai kina e vuqa na gonevuli oti na koronivuli e tolu oqo ka ra sa veiqaravi oti ena tabana ni veilitaki ni noda vanua ena matanitu, na veikabani, na bisinisi kei na yalava ni bula cava ga, era sa vakaraitaka na i vakarau ni vuli era a marautaka ka ra a qaravi mai kina.

Ena gauna oqo era sa bose oti tiko na vuli oti mai na koronivuli lelevu e tolu qo ena kena laurai me na dua na i wali ni leqa oqo.

E gadreva tiko o ira na vuli oti me na kua ni veisautaki na lawa ni nodra vakacurumi na gonevuli ena koronivuli e tolu oqo, baleta ni sa vakamawe tiko na vua ni gonevuli era ta mai kina ena noda vanua kei na veivanua era sa kacivi mera laki veiqaravi kina.

More Stories