Me tekivu mai vale na veivakatavulici

Update: 9:49AM E DUA na kena i wali oya me ra sa lotu vakavinaka na i tubutubu ka levu na gauna ni veitalanoa vakavuvale, era na qai muria vakavinaka na gone na sala e dodonu.

Oqori na nona rai o Peni Delaibatiki, na vunivola levu ni soqosoqo ni Qasenivuli i Taukei ena noda vanua.

E vosa tiko oqo o Delaibatiki ena vuku ni tukutuku tabaki ni oti e dua na vakadidike ni rauta ni 48 na pasede na gonevuli era vakatarogi, era vakadinadinataka ni ra sa veiyacovi oti ni sebera ni ra yacova yani na yabaki 14.

E na vakadidike ni Global School Health Survey ( GSHS) ena yabaki sa oti, e kaya na Minisita ni Bula o Rosy Akbar ni basika mai na fika oqo mai na nodra vakatarogi e 3705 na gonevuli era a vakaitavi ena vakadidike oqo.

A mai cauraka toka na i tukutuku oqo na Minisita ena siga Moniti ena dua na porokaramu ni tiko bulabula ena Univesiti ni Ceva ni Pasifika.

E kunei talega ni 49 na pasede na gonevuli oqo era vakadinadinataka ni ra sa gunuva oti na yaqona ni valagi ni sebera ni yacova na yabaki 14.

E veivakasalataki o Delaibatiki ni levu vei keda na i Taukei, e dodonu meda sa lesu ga ki na ivakavuvuli era dau vakabibitaka na noda qase, oya na kena vakabibitaki na lotu ni vuvale ena veisiga, ka me ra vakararamataki tiko ena i vakavuvuli vinaka mai na i Vola Tabu na luveda.

�Baleta ni sa levu sara na cakacaka ni meca.

�Ka dodonu talega me levu na noda gauna ni dabe ka veitalanoa kei ira na luveda ena veisiga, me rawa ni da yadrava tiko kina na veika era lako curuma ena veisiga na gone,� e kuria o Delaibatiki.

E kaya o Talatala Iliesa Naivalu mai na tabana ni bula raraba ni Lotu Wesele ni dau gadreva tu me dua na vakadidike ena vuku ni ulutaga oqo me rawa ni da kila kina na raba kei na revurevu ni veiyacovi gone e yaco tiko e Viti.

�Ia oqo, ni sa vakaraitaki vei keda  ena vakadidike oqo, sa vakadeitaka na noqu siqe ni sa tiko dina  saraga e cake na i wiliwili ni  gonetagane kei na goveyalewa vuli ena paraimiri era sa veiyacovi tiko ni bera na yabaki 14.

Oqo sa i kaukau mai ni gauna vou, ni sa vakamalumalumtaki na veiyavu bibi ka kaukauwa ka da dau maroroi kina, na kena sa curutaki mai na veimataqali vakavuvuli vou, na soli vakayauyau ni dodonu vei ira na  luveda kei na draki ni vaqara bula era sa ogaoga kina na i tubutubu, ka sa sega ni kauwaitaki na gone,� e kaya o Naivalu.

 

More Stories