Me teivaki na kakana ni lauqa e Yasawa

Update: 9:48AM ERA sa vakauqeti na lewenivanua mai Nacula e Yasawa me ra tea vakalevu na kakana e rawa ni ra vorata na gauna ni lauqa me vaka na kumala.

Vakaraitaka mai Nacula o Viliame Mainawalala ni dodonu me ra  sa na vulica tiko na lewenivanua era tiko ena veibaravi ka sotavi ira na veiveisau ni draki na mataqali kakana vakacava me ra tea me kakua ni ra leqa ena nodra vakania na nodra vuvale ena kakana bulabula.

 E kaya ni veivakauqeti na nodra sasaga na lewenikoro mai Navotua ni ra tea tiko e ciwa kece na veimataqali kumala kei na kakana dina ena veivuke ni WWF Pacific ki na yanuyanu oqo.

 Esa kerei ira talega na lewe ni tikina o Nacula o Mainawalala na nodra tea na kakana draudrau e rawa ni tamusuki ena dua na gauna lekaleka ni oti e dua na leqa tubu koso.

 Ni mai vakacavari vinaka na nodra i tuvatuva oqo kei na WWF na lewenikoro o Navotua, era sa mai marautaka tale tiko na lewenikoro na kena mai tamusuki oqo vakarua na kedra kumala.

 Era sa vakauqeti ga me ra tea vakalevu na kumala mai na kena teivaki na dalo kei na tavioka, baleta me ganita na draki kei na leqa e dau sotavi mai Yasawa ena loma ni tikina o Nacula.

 Na nodra i vurevure ni rawa- ka e Yasawa oya na saravanua, ka levu na otela era mai tauyavutaka na vavalagi era tiko ena yatu Yasawa ena gauna oqo. 

More Stories